Jón Gunnarsson, samgönguráðherra vill efla sveitarstjórnarstigið og sagði á landsþingi Sambandi íslenskra sveitarfélaga á dögunum að hann vilji sjá ákveðna hvata innbyggða í tekjustofnakerfi sveitarfélaga sem styddi betur við sameiningu þeirra. Tryggja þurfi að reglur Jöfnunarsjóðs sveitafélaga hjálpi vel þeim sveitarfélögum sem vilja sameinast og leitað verði leiða til að tryggja að slíkar sameiningar styrki stöðu sveitarfélaga sem ein meginstoð velferðar íbúanna.

„Hér sé ég fyrir mér að setja megi frekari hvata í kerfið þannig að sveitarfélög sjái ávinning og hagræði af því að sameinast. Mín hugsun er sú að verulegir fjármunir gætu orðið til ráðstöfunar úr Jöfnunarsjóði sveitarfélaga á næstu árum til að styrkja sveitarfélög við undirbúning sameiningar, endurskipulagningar og uppbyggingar í sameinuðu sveitarfélagi. Frumkvæði um þetta verður þó að koma frá sveitarfélögunum sjálfum,“ sagði samgönguráðherra en undir hann heyra málefni sveitarstjórnarstigsins.

Samgönguráðherra hefur ákveðið að setja á fót verkefnahóp sem ætlað er að vinna að stefnumörkun stjórnvalda á þessu sviði en sú vinna yrði unnin í beinu framhaldi af því að nefnd um stöðu og framtíð sveitarstjórnarstigsins skili sinni niðurstöðu. Verkefnahópnum yrði ætlað að skoða frekari leiðir til að stuðla að sameiningu sveitarfélaga, meðal annars  með hliðsjón af reynslu liðinna ára.

Smári

Á mánudag og þriðjudag verður haldin á Ísafirði ráðstefna undir yfirskriftinni „Skemmtiferðaskip á réttri leið?“ Það er Háskólasetur Vestfjarða sem stendur fyrir ráðstefnunni í samstarfi við Nýsköpunarmiðstöð Íslands, Ferðamálasamtök Vestfjarða, Markaðsstofu Vestfjarða, Ísafjarðarbæ, og Vesturferðir og er henni ætlað að varpa ljósi á þessa ört vaxandi ferðaþjónustugrein á Íslandi og fjalla um hana frá ýmsum hliðum. Lögð er áhersla á hvernig byggja megi greinina upp til framtíðar með sjálfbærni að leiðarljósi. Fjölmargir koma að borðinu og erindi flytja fyrirlesarar úr röðum fræðimanna og sérfræðinga sem og hagsmunaaðila, sveitarstjórna og íbúa. Aðalfyrirlesari er Frigg Jörgensen sem er framkvæmdastjóri AECO sem eru hagsmunasamtök útgerða könnunar- og skemmtiferðaskipa á Norðurslóðum. Frigg hefur einnig víðtæka reynslu af ferðaþjónustu á Svalbarða. Hún flytur fyrirlestur sinn á ensku en aðrir liðið ráðstefnunnar fara fram á íslensku. Á eftir hverri fyrirlestralotu er síðan tími til umræðna.

Talsverð umræða hefur verið um komur skemmtiferðaskipa til Ísafjarðar, en skipakomum hefur fjölgað gífurlega undanfarin ár og eru þær skráðar 100 í sumar. Birna Lárusdóttir, verkefnastjóri hjá Háskólasetri Vestfjarða sem vinnur að skipulagningu ráðstefnunnar segir hana hugsaða sem samráðsvettvang fyrir alla þá sem hafa hagsmuna að gæta og þá gildir einu hvort það séu íbúar á stöðum sem skemmtiferðaskip sækja eða aðilar úr ferðaþjónustunni og hvetur hún íbúa á svæðinu eindregið til að mæta.

Eftir hádegi á þriðjudag verður verður Ísafjörður í brennidepli og taka þá til máls Guðmundur M. Kristjánsson hafnastjóri sem fjallar um stefnumótun Ísafjarðarbæjar í ferðaþjónustu, Kolbrún Sverrisdóttir ræðir sjónarmið íbúans og Halldóra Björk Norðdahl sjónarmið verslunareigandans, þá mun Daníel Jakobsson tala fyrir hönd Ferðamálasamtaka Vestfjarða og framkvæmdastjóri Vesturferða Ásgeir Höskuldsson sem þjónustar flest þau skip sem til Ísafjarðar koma um ferðir. Þá verður gefinn rúmur tími til umræðna þar sem allir geta lagt til málanna og komið með spurningar. Verið er að vinna að stefnumótun í ferðamálum á Vestfjörðum og verða þeir sem að þeirri vinnu koma á ráðstefnunni til að sjá og heyra mismunandi sjónarmið sem veganesti inn í stefnumótunina.

Sigríður Kristjánsdóttir og Jón Páll Hreinsson stýra ráðstefnunni sem verður sett á mánudagsmorgun klukkan 09:30 af Þórdísi Kolbrúnu Reykfjörð Gylfadóttur ráðherra ferðamála. Ráðstefnan stendur sem áður segir í tvo daga og segir Birna að ráðstefnugjaldi hafi verið haldið í lágmarki svo að sem flestir ættu kost á þátttöku, en gjaldið er 5000 krónur og má skrá þátttöku á heimasíðu Háskólaseturs Vestfjarða, þar sem einnig má skoða dagskrána. Sækja má hluta ráðstefnunnar eigi gestir ekki kost á því að sitja hana í heild sinni.

annska@bb.is

Matvælastofnun vill að Ísafjarðarbær greiði húsaleigu eða útvegi húsnæði undir landamærastöð stofnunarinnar á Ísafirði. Að öðrum kosti verður landamærastöðin líklega lögð niður. Stöðin er til húsa í Vestrahúsinu á Ísafirði. Landamærastöðin er rekin í samræmi við reglur EES sem kveða á um að slík stöð skuli vera til staðar þar sem innflutningur á dýraafurðum frá ríkjum utan EES fer fram. Stöðin á Ísafirði hefur verið rekin síðan 1999, fyrst af Fiskistofu og síðustu 10 árin af Matvælastofnun. Í bréfi Matvælastofnunar til Ísafjarðarbæjar kemur fram að leigusamningur við Vestra renni út í lok apríl og leigusali hafi boðið stofnuninni nýjan samning með talsverðri hækkun á leigu. Með hliðsjón af þeim fáu sendingum sem hafa borist á stöðina, en sum ár hafa engar sendingar borist, telur Matvælastofnun ekki grundvöll til að reka landamærastöð á Ísafirði. Á það er bent að hafnaryfirvöld á Akureyri og í Þorlákshöfn skaffa húsnæði undir sínar stöðvar án endurgjalds. Í bréfinu er tekið fram að ef landamærastöðinni verður lokað geti tekið u.þ.b. 2-3 ár að opna stöðina aftur.

Bæjarstjóra hefur verið falið afla upplýsinga um hvernig húsnæði Matvælastofnun er að leita eftir og hvers vegna sveitarfélög en ekki ríki eigi að standa undir kostnaðinum við rekstur landamærastöðvar.

Smári

Moksturstæki Vegagerðarinnar hafa síðustu daga verið að störfum á Dynjandisheiði. Guðmundur R. Björgvinsson, yfirverkstjóri hjá Vegagerðinni á Ísafirði, vonast til að vegurinn opni í dag. „Ef ekkert óvænt kemur upp á þá ætti það að takast. En ég lofa því ekki fyrr en ég sé síðasta skaflinn fara,“ segir hann. Vegagerðin er búin að opna veginn um Hrafnseyrarheiði.

Að sögn Guðmundar er mokstur á heiðunum óvenju snemma á ferðinni í ár, enda hafa snjóalög ekki verið mikil. „Það er ekkert sérlega mikill snjór uppi, en hann er harður og mikill klaki og seinlegt að moka.“

Hann minnir vegfarendur sem hyggjast keyra heiðarnará  að hafa í huga að þó ágætisveður sé á láglendi þá er vetur konungur ekki búinn að sleppa takinu af fjallvegum.

Smári

Pétur G. Markan, formaður Fjórðungssambands Vestfirðinga, fagnar ákvörðun Vegagerðarinnar um að sækja um framkvæmdaleyfi vegna vegagerðar í Gufudalssveit. Vegagerðin stefnir á að leggja veginn eftir veglínu Þ-H sem liggur í gegnum Teigsskóg. Í áliti Skipulagsstofnunar á umhverfismati í Gufudalssveit er mælt með að fara aðra leið, en í henni felst jarðgangagerð undir Hjallaháls.

„Skipulagsstofnun leggst ekki beint gegn veglínu Þ-H og þetta er sú leið sem Vegagerðin hefur stefnt á. Að mínu mati er mikilvægt að Vegagerðin er einbeitt og ætlar ekki að hika, enda eru þetta einar mikilvægustu samgöngubætur á Vestfjörðum,“ segir Pétur.

Málefni vegagerðar í Gufudalssveit hafa þvælst í kerfinu í rúman áratug. Fyrri tilraun Vegagerðarinnar til að leggja veg um Teigsskóg endaði fyrir dómstólum árið 2009 felldi Hæstiréttur úr gildi úrskurð umhverfisráðherra um að leyfa vegagerð í Teigskógi.

Pétur segir augljóst að telji menn að þeir þurfi að leita réttar síns vegna Teigskógar, þá verði það gert eftir réttum leiðum. Hann er ekki á þeirri skoðun að ákvörðun Vegagerðarinnar að stefna áfram á veg í gegnum Teigsskóg  tefji vegabætur umfram það sem aðrar leiðir bjóða upp.

„Ég held að það sé augljóst að allar þær leiðir sem eru í boði taka langan tíma. Sú leið sem Skipulagsstofnun mælir með er dýrari og ég sé ekki að hún stytti tímaramann, það vita allir sem hafa fylgst með jarðgangaumræðu á Íslandi,“ segir Pétur.

Smári