Heildaraflinn á strandveiðunum sumarið 2018 varð 9.803 tonn sem skiptist í 9.396 tonn af kvótabundnum tegundum og 391 tonn af ufsa sem landað var sem VS afla. Af kvótabundnu tegunundum var langmest af þorski 9.075 tonn. Heimilt var að veiða 10.200 tonn auk 700 tonna af ufsa.

A svæðið, sem nær meðal annars yfir Vestfirði, varð langaflahæst með 4.210 tonn af kvótabundnum tegundum eða 45% af heildaraflanum. Á A svæðinu stunduðu 202 bátar starndveiðar en alls voru 548 bátar á veiðunum.

Heildarverðmæti strandveiðiaflans var 2.194 milljónir króna. Þar af voru 90% seld í gegnum fiskmarkaði eða 8.857 tonn. Til fiskvinnslu voru seld 685 tonn samkvæmt samningi um almennan byggðakvóta yfir allt landið, sem er um 7% af heildarstrandveiðiaflanum.

Þetat kemur fram í skriflegu svari sjávarútvegs- og landbúnaðarráðherra á alþingi við fyrirspurn frá Ingu Sæland um strandveiðar árið 2018.

Framkvæmd sóknaráætlana landshluta hefur almennt tekist vel frá árinu 2015 að því er fram kemur í úttekt sem ráðgjafarfyrirtækið Evris gerði fyrir samgöngu- og sveitarstjórnarráðuneytið. Í úttektinni var lagt mat á það hvort tekist hefði að ná markmiðum samninga um sóknaráætlanir. Þar var jafnframt bent á atriði sem betur mættu fara og lagðar fram tillögur til úrbóta.

Í skýrslu Evris segir :

„Það er almennt mest sátt um að sóknaráætlanir hafi treyst stoðir menningar í
landshlutum. Nokkur einhugur ríkir um að sóknaráætlanir hafi hóflega styrkt
samkeppnishæfni landshlutanna. Það er talsverður munur á afstöðu fólks hvort
sóknaráætlanir hafi tryggt gagnsæi við úthlutun og umsýslu opinberra fjármuna
og fært vald frá ríki til sveitarfélaga.“

Þá segir að samráðsvettvangur sem komið var á fót í öllum
landshlutum til að tryggja lýðræðislega aðkomu að verkefninu hafi ekki gengið sem skyldi og  finna þarf leiðir til að festa í sessi tilvist þeirra.

Stuðningur við menningartengd verkefni úr uppbyggingarsjóðum hefur aukist á
tímabilinu á kostnað styrkja til atvinnuþróunar og nýsköpunar. Styrkir eru almennt styrkir frekar lágir og „má færa rök fyrir því að meiri slagkraftur sé í færri en stærri styrkjum.“

Að mati Evris væri skynsamlegt að búa til hvata í uppbyggingarsjóði, sérstaklega þann hluta sem snýr að atvinnuþróun- og nýsköpun, og nota þannig sóknaráætlanir sem tæki til að styrkja það markmið að auka samkeppnishæfni landshlutanna og landsins í
heild um leið.

Þá segir að úthlutunarnefndir og fagráð séu í flestum tilvikum skipuð
einstaklingum sem búa á viðkomandi svæðum „en skynsamlegt gæti verið að
gera auknar kröfur um að einstaklingar utan svæðis, með sérþekkingu, taki
einnig þátt í fagráðum og úthlutunarnefndum í öllum landshlutum.“

Meirihluti sveitarstjórnar er ákveðinn í því að reisa 12 öryggisíbúðir fyrir aldraða. Þetta kemur fram í samþykkt í hreppsnefndinni á síðasta fundi. Þar segir að sveitarstjórn Tálknafjarðarhrepps samþykkir að hreppurinn leggi fram 16% stofnframlag til byggingar íbúðanna á móti 24% framlagi ríkissjóðs. Framlag hreppsins verður 36,9 milljónir króna.  Miðað við þessar tölur virðist gert ráð fyrir að kostnaðurinn við íbúðirnar 12 verði um 230 milljónir króna.

í samþykktinni kemur ennfremur fram að „stofnframlag Tálknafjarðarhrepps greiðist með peningum, eftir því sem verkinu miðar og í samræmi við nánara samkomulag við Landsbankann um brúarlán á meðan á framkvæmdum stendur. “

Bryndís Sigurðardóttir, sveitarstjóri segir að sótt hafi verið um til Íbúðalánasjóðs um stofnframlag frá ríkinu 24% af kostnaði. Erindið hefur ekki verið afgreitt og ekki er vitað hvort framlag ríkisins verði samþykkt. Án þess verður ekkert af framkvæmdum að sögn Bryndísar.

Gert er ráð fyrir að um leiguíbúðir verði að ræða þar sem verði öryggisþjónusta, en ekki hjúkrunarrými eða þjónustuíbúðir.

Lilja Magnúsdóttir, E-lista er á móti áformunum og segir í bókun að ekki hefur verið sýnt fram á þörf íbúa fyrir þessar íbúðir og  ekki heldur hvernig tryggja eigi rekstur þeirra til frambúðar.

Lilja Magnúsdóttir sagði í samtali við Bæjarins besta að sveitarfélagið hefði ekkert bolmagn til þess að ráðast í þessa framkvæmd og væri hún þess vegna á móti. Hún spyr líka hvernig eigi að fjármagna 60% sem eru umfram stofnframlögin.

Vítaverð ráðstöfun fjár

Í bókunin sinni segir Lilja að „ráðstöfun fjármuna sveitarfélagsins er vítaverð af hálfu meirihluta sveitarstjórnar þegar stór hluti þorpsins býr við óviðunandi ástand í neysluvatnsmálum og jafnframt algjört neyðarástand með tilliti til brunavarna vegna vatnsskorts, götur sveitarfélagsins eru illa farnar vegna skorts á viðhaldi og fráveita sveitarfélagsins er í algjörum ólestri.“

E listinn vildi að haldin yrði íbúafundur um málið sem allra fyrst en meirihlutinn vildi frekar efna til slíks fundar í byrjun september í haust.

Fimmtudaginn 9. maí bauð 9.-10. bekkur á opið hús í Tálknafjarðarskóla til þess að fylgjast með úrslitakeppni um verkefni Landsbyggðavina sem nemendur gerðu til að fegra, breyta og bæta bæinn sinn, Tálknafjörð. Gaman var að sjá hversu margir voru komnir til að fylgjast með; foreldrar, kennara og sveitarstjórnarfólk.
Fríða Vala Ásbjörnsdóttir formaður Landsbyggðavina kom til þess að fylgjast með kynningu nemendanna og í dómnefnd sátu þeir Páll Líndal, Ph.D í umhverfissálfærði, stundakennari við HÍ, Benjamín Ragnar Sveinbjörnsson Ph.D. í lífrænni efnafærði, dósent við HÍ, og Freyja Magnúsdóttir fulltrúa atvinnulífsins á Tálknafirði.
Í verkefniLandsbyggðavina: Framtíðin er núna fengu nemendur það verkefni að hugleiða hvaða tækifæri og auðlegð búi í þorpinu sínu. Þrjú verkefni komust í úrslit:

• Þyrlupallur á Tálknafirði
• Jörðmynd
• Hjólabrettagarður á Tálknafirði.

Dómnefndin var sammála um ágæti allra verkefnanna og Páll Líndal, formaður dómnefndar, hvatti nemendur til þess að halda áfram með verkefnin. Gaman er að segja frá því að hópar tveggja verkefna hafa áframsent erindi til sveitarstjórnar vegna verkefnanna. Verður spennandi að sjá hvað kemur út úr því.

Frétt á vef Tálknafjarðarhrepps.

Fjárfest var fyrir 575 millj. kr. á árinu 2018 en áætlaðar fjárfestingar voru 730 millj. kr. Helsta skýring frávika frá áætlun er sú að inni í fjárfestingum er ekki 100 millj. kr. fjárfesting á árinu vegna Sindragötu 4a þar sem áætlað er að selja allar íbúðirnar á árinu 2019 og þær því flokkaðar meðal veltufjármuna. Fjárfestingar sveitarsjóðs námu 520 millj. kr. og fjárfestingar B-hluta stofnana námu 55 millj. kr.

Mikil umsvif voru við gatnagerð og stíga á árinu þar sem malbikunarstöð kom vestur og var fjárfest fyrir 275 millj. kr. Götur sveitarfélagsins voru malbikaðar fyrir 100 millj. kr., þar af 55 millj. kr. á Ísafirði og 45 millj. kr. á Þingeyri, Flateyri og Suðureyri. Stærsta einstaka framkvæmdin á árinu var hellulögn Tangagötu frá Þvergötu að Austurvegi sem nam 70,5 millj. kr. Nýjar götur; Akurtunga og Æðartangi voru gerðar fyrir um 66 millj. kr. á árinu og nýr göngustígur var lagður meðfram grjótgarðinum í Fjarðarstræti fyrir 33 millj. kr. sem hefur vakið mikla ánægju meðal íbúa og notkun hans farið fram úr öllum spám.

Til viðbótar við gatnagerð og stíga voru settar 107 millj. kr. í skólamannvirki á árinu. Þar má helst nefna hönnun á viðbyggingu við Eyrarskjól sem verður til þess að skólinn getur tekið við fleiri börnum og bætir starfsmannaðstöðu til muna. Gerðar voru breytingar innanhúss í Grunnskólanum á Ísafirði til að koma fyrir starfsemi Dægradvalar sem nú getur tekið við öllum börnum 1. til 3. bekkja. Skólalóðir Grunnskólanna á Ísafirði og Flateyri voru endurnýjaðar á árinu.

Miklar framkvæmdir voru í snjóflóðavörnum á árinu og var hlutur sveitarfélagsins um 54,6 millj. kr.  Framkvæmdir í Kubba fóru á fullt og nam kostnaðurinn alls 573 millj. kr., en Ofanflóðasjóður greiðir 90% af honum.

Fjárfesting í íþróttamannvirkjum nam um 35 millj. kr. og tækjakaup eignasjóðs námu um 18,3 millj. kr. Meðal annars var keyptur skólabíll á Þingeyri fyrir 5,7 millj. kr. og björgunarbúnaður fyrir slökkviliðið fyrir 6,5 millj. kr. Nýja þjónustuhúsið á tjaldsvæðinu á Þingeyri var klárað fyrir um 9,6 millj. kr., hverfisráðin fengu úthlutað 11,1 millj. kr. og uppbyggingasamningar voru framkvæmdir fyrir 8 millj. kr.

Miðvikudaginn 15. maí kl. 9:00 mun Lisa Christine Vidal verja meistaraprófsritgerð sína í haf- og strandsvæðastjórnun við Háskólasetur Vestfjarða. Ritgerðin ber titilinn Legislation meets science: Implementing a macroalgae farm to reach the requirements of the Water Framework Directive.  Vörnin fer fram í Háskólasetrinu og er opin almenningi.

Í rannsókninni fjallar Lisa um möguleika þararæktunar sem lið í því að uppfylla rammatilskipun ESB um vatn sem Ísland er aðili að. Umfram næringarefni og hættan á ofauðgun af mannavöldum í hafinu er ein helsta ógning sem stafar að vatnakerfum á landi og sjó á Íslandi. Í rannsókninni var kannað hvort ræktun stórþörunga geti gagnast við upptöku umfram næringarefna til að bæta vatnsgæði og þar með mæta kröfum vatnatilskipunarinnar. Meðal annars var gerð tilraun með að setja upp litla þararækt í Skutulsfirði í tengslum við rannsóknina. Nánari lýsingu má nálgast í útdrætti á ensku.

Leiðbeinandi verkefnisins er dr. Peter Krost, sérfræðingur í sjávarlíffræði við Coastal Research and Management í Kiel í Þýskalandi og kennari í fisk- og sjávareldi við Háskólasetur Vestfjarða. Prófdómari er dr. Agnes Mols Mortensen, líffræðingur við Fiskaalning, rannsóknarmiðstöð Færeyja um sjávareldi.

Bæjarráð Ísafjarðarbæjar hefur samþykkt að greiða til Brúar lífeyrissjóðs áfallnar lífeyrisskuldbindingar í Jafnvægissjóð og Varúðarsjóð vegna Hjallastefnunnar á grunni þjónustusamnings Hjallastefnunnar við Ísafjarðarbæ samtals kr. 2.826.830.

Þetta kemur fram í fundargerð bæjarráðs frá síðasta mánudag.

Bæjarráð felur bæjarstjóra að ganga til uppgjörs við Brú lífeyrissjóð vegna ógreidds framlags sem Hjallastefnan telur sig ekki skylduga til að greiða.

Vísað er til þess að þegar lögum um lífeyrissjóð starfsmanna ríkisins var breytt árið 1997 hafi ríkissjóður með samkomulagi milli fjármála- og efnahagsráðherra, Sambands íslenskra sveitarfélaga og Brúar lífeyrissjóðs, samhliða lagabreytingunni, skuldbundið sig til að greiða án lagaskyldu framlag til A-deildar Brúar vegna skuldbindinga aðila, þ.m.t. sveitarfélaga, vegna verkefna sem að meirihluta eru fjármögnuð af ríkissjóði með samningum og ríki ber að sinna.  Af þeim sökum fellst Ísafjarðarbær á að greiða umrædda fjárhæð, þótt lagaskylda sé ekki ótvíræð.

Stuðst er við minnisblað frá Sambandi íslenskra sveitarfélaga, dagsett 16. apríl sl., og frá Akureyrarbæ, dagsett 9. maí sl. um sams konar mál og lagt er til að samþykkja greiðslu á sömu forsendum og Akureyrarbær.