Héraðsdómur Vestfjarða hefur dæmt í asparmálinu sem upp kom á Flateyri síðastliðið sumar. Einn húseigandi við Drafnargötu felldi án heimildar 9 aspir sem uxu á göngustíg við húsið.
Aspirnar voru í eigu Ísafjarðarbæjar og gróðursettar í minningu þeirra sem fórust í snjóflóðinu á Flateyri árið 1995. Mikil óánægja varð á Flateyri með þetta háttalag.
Ísafjarðarbær höfðaði mál gegn gerandanum sem er búsettur á Álftanesi. Hann gekkst við verknaðinum en taldi sig vera að gera sveitarfélaginu greiða með því að fella aspirnar.
Ákærði var dæmdur í 200 þúsund króna sekt og auk þess að greiða rúmar 600 þúsund krónur í þóknun til skipaðs verjanda síns. verði sektin ekki greidd kemur varðhald í 14 daga til framkvæmda.