Landsbyggðin vill frekar greftun en líkbrennsla frekar fyrir sunnan

MMR gerir ýmiss konar kannanir og spurt er um ýmislegt. Í dag birti MMR niðurstöður könnunar á því hvers konar útför landsmenn myndu kjósa fyrir sjálfa sig. Kom í ljós að viðhorfin eru verulega msimunandi milli landsbyggðarinnar og höfuðborgarsvæðsins.

Helstu niðurstöður:

 Alls sögðust 59% kjósa sér líkbrennslu eftir andlát en 38% kváðust vilja greftrun. Þá kváðust 3% kjósa annars konar útför.

Svarendur yngsta aldurshópsins (18-29 ára) voru líklegust allra aldurshópa til að segjast kjósa bálför (62%). Svarendur 68 ára og eldri (44%) voru hins vegar líklegust til að segjast kjósa jarðarför.

Íbúar landsbyggðarinnar voru líklegri til að segjast kjósa sér jarðarför (55%) en svarendur af höfuðborgarsvæðinu kváðust frekar kjósa bálför (68%).

Stuðningsfólk Viðreisnar (80%), Pírata (80%) og Samfylkingar (71%) reyndist líklegast til að segjast kjósa að halda inn í eilífðarmyrkrið með bálför en stuðningsfólk Flokks fólksins (59%) og Sjálfstæðisflokks (53%) reyndust líklegust til að kjósa jarðarför. Þá reyndust Píratar (10%) líklegastir allra svarenda til að segjast kjósa annars konar útför.

Könnunin var framkvæmd dagana 15. til 21. nóvember 2018 og var heildarfjöldi svarenda 928 einstaklingar, 18 ára og eldri.