Íbúar Vestfjarða voru 6.870 þann 1. janúar 2017 og hafði fækkað um 13 manns frá 1. janúar 2016. Þetta kemur fram í nýjum tölum Hagstofu Íslands um fólksfjölda.

Fólkfjölgun var í öllum sveitarfélögum á Vestfjörðum nema í Ísafjarðarbæ, Tálknafjarðarhreppi og Árneshreppi. Mesta fólksfækkunin var á Tálknafirði, en á tímabilinu fór íbúatalan úr 267 í 236, eða um 11 prósent. Hlufallslega var meiri fólksfækkun í Árneshreppi, en þar fækkaði fólki um 16 prósent, fór úr 55 íbúum í 46. Um áramótin bjuggu 3.608 í Ísafjarðarbæ og hafði fækkað um 15 manns á einu ári.

Mesta fólksfjölgunin varð í Vesturbyggð, um 17 manns, og í Reykhólahreppi, um 15 manns.

Íbúafjöldi á  Vestfjörðum eftir sveitarfélögum.

Ár                                      2016                      2017

Bolungarvík                        904                         908

Ísafjarðarbær                    3623                      3608

Reykhólahreppur                 267                        282

Tálknafjarðarhreppur           267                        236

Súðavíkurhreppur                184                        186

Kaldrananeshreppur             103                        106

Árneshreppur                        55                           46

Strandabyggð                      467                        468

Vesturbyggð                      1013                       1030

smari@bb.is

Frá og með morgundeginum verður vegurinn norður í Árneshrepp opnaður tvisvar í viku.  Fréttvefurinn Litlihjalli hefur eftir Jóni herði Elíassyni, rekstrarstjóri Vegagerðarinnar á Hólmavík, að mokað verði á þriðjudögum og föstudögum ef veður og snjóalög leyfa. Snjólétt hefur verið á Ströndum í vetur eins og annars staðar á landinu og vegurinn norður hefur mikið til verið jeppafær. Vegna lítilla snjóalaga hefur Vegagerðin sent moksturstæki norður nokkrum sinnum í vetur þrátt fyrir mokstursregluna sem kveður á um að ekki sé mokað fyrr en eftir 20. mars.

smari@bb.is

Þingeyringurinn Pálmar Kristmundsson og samstarfsfólk hans hjá PKdM arkitektum hlutu á dögunum menningarverðlaun DV í byggingarlist fyrir hátækniverksmiðju Alvogen í Vatnsmýrinni. Er þetta annað árið í röð sem stofan hlýtur verðlaunin, en Pálmar er margverðlaunaður fyrir verk sín. Pálmar ólst upp á Þingeyri og flutti hann nýverið aftur í fjörðinn fagra þar sem hann hefur útbúið sér heimili í gömlu steypustöðinni að Söndum, en hann á og rekur PKdM arkitekta í Reykjavík.

Að mati dómnefndar menningarverðlauna DV er nýbygging Alvotech, sem er hluti af skipulagi Vísindagarða í Vatnsmýrinni, einstaklega fallegt dæmi um velheppnaða samvinnu og metnað allra þeirra aðila sem komu að verkinu, bæði á hönnunar- og framkvæmdatíma, sem skilaði af sér vönduðu og fagmannlegu handverki.

Hér má lesa umfjöllun dómnefndar í heild sinni.

annska@bb.is

Til að auka öryggi flutningskerfisins á Vestfjörðum á að leggja 132 kV jarðstreng í Dýrafjarðargöng milli Arnarfjarðar og Dýrafjarðar. Áformað er að reka strenginn fyrst um sinn á 66 kV spennu.

Jarðstrengurinn mun leysa af hólmi hluta Breiðadalslínu 1, 66 kV loftlínu milli Mjólkár og Breiðadals, þar sem línan liggur yfir Flatsfjall í allt að 750 metra hæð yfir sjávarmáli og aðstæður eru erfiðar til viðhalds og viðgerða.

Lagning strengsins er áformuð samhliða jarðgangagerðinni og verður hann tæplega 13 km langur, frá tengivirki við Mjólká að fyrstu stæðu í Dýrafirði þar sem hann verður tengdur inn á Breiðadalslínu 1.

Með lagningu 132 kV strengs verður með einföldum hætti hægt að spennuhækka Breiðadalslínu 1 og eyða þannig mögulegum flöskuhálsi í flutningsgetu línunnar.

Umhverfisáhrif jarðstrengsins eru metin óveruleg þar sem hann fylgir mannvirkjabelti samgangna og er ekki að valda nýju raski.

smari@bb.is

Bæjarstjórn Ísafjarðarbæjar hefur samþykkt útgáfu framkvæmdaleyfis til Vegagerðarinnar vegna jarð- ganga milli Arnarfjarðar og Dýrafjarðar í Ísafjarðarbæ. Auglýsing um útgáfu leyfisins birtist í Lögbirtingablaðinu fyrir helgi. Tilboð í verkið voru opnuð hjá Vegagerðinni 26. janúar síðastliðinn. Lægsta tilboðið áttu tékkneska verktakafyrirtækið Metrosta í samvinnu við Suðurverk. Tilboðið hljóðaði upp á tæplega 8,7 milljarða króna, 93% af áætlun um verktakakostnað.

Samkvæmt áliti Skipulagsstofnunar um mat á umhverfisáhrifum frá 17. maí 2013 eru ekki sett skilyrði fyrir framkvæmdaleyfinu. Hins vegar telur Skipulagsstofnun að áhrif framkvæmdarinnar á fornleifar verði nokkuð neikvæð m.a. þar sem fyrir liggur að ekki verði hjá því komist að raska slíkum minjum. Stofnunin leggur áherslu á að farið verði í hvívetna eftir ábendingum Minjastofnunar Ísland.

Ísafjarðarbær setur fram eftirfarandi skilyrði fyrir útgáfu framkvæmdaleyfis: Vegna framkvæmda innan hverfisverndarsvæða H1 sbr. deiliskipulag og Aðalskipulag Ísafjarðarbæjar 2008-2020 skal leitast við að varðveita sérkenni svæðanna, þ.e. menningar og náttúruminjar á afskekktum svæðum og hálendi.

smari@bb.is

Ný umbúðalína Fisherman er tilnefnd til FÍT-verðlaunanna sem veitt verða í vikunni. Fisherman sem er ferðaþjónustufyrirtæki á Suðureyri, er einnig með vefverslun þar sem hægt er að panta sér harðfisk, þorskalifur, söl og sjávarsalt yfir internetið. Það er Jóhanna Svala Rafnsdóttir hjá Kapli sem hannaði umbúðalínuna fyrir Fisherman.

FÍT, eða félag íslenskra teiknara, hefur um árabil veitt verðlaun fyrir það sem skarar fram úr í grafískri hönnun og myndskreytingum á Íslandi ár hvert. Tilnefnt er til verðlauna í 19 flokkum sem ná yfir helstu undirflokka grafískrar hönnunar og einnig eru veitt ein aðalverðlaun fyrir það sem þykir bera höfuð og herðar yfir önnur verk, þvert á flokka.

Aldrei hafa borist fleiri tilnefningar til verka en nú er um 300 tilnefningar bárust og voru 82 þeirra tilnefnd. Verkin sem vinna til verðlauna og viðurkenninga verða sýnd á veglegri sýningu sem undanfarin ár hefur verið haldin í tengslum við HönnunarMars. Verðlaunaafhendingin fer fram í Tjarnarbíó 22.mars klukkan 18:30.

annska@bb.is