Bæjarstjórn Vesturbyggðar hefur samþykkt eftirtaldar breytingar á skipan í nefndir og ráð bæjarins:

Esther Gunnarsdóttir tekur sæti sem aðalmaður í menningar- og ferðamálaráði í stað Rögnu Jennýar Friðriksdóttur og að Anna Vilborg Rúnarsdóttir taki sæti sem varamaður.

Ásdís Snót Guðmundssdóttir tekur sæti sem varamaður í skipulags- og umhverfisráði í stað Rögnu Jennýar Friðriksdóttur.

Rebekka Hilmarsdóttir tekur sæti sem aðalmaður í fjallskilanefnd Vesturbyggðar og Tálknafjarðahrepps í stað Ásgeirs Sveinssonar.

Fram kemur í endurskoðunarskýrslu KPMG fyrir Vesturbyggð fyrir árið 2018 sem og í stjórnsýsluskoðunum frá árinu 2015 að KPMG hefur ítrekað bent á það að ekki hafi verið gætt að ákvæðum sveitarstjórnarlaga nr. 138/2011 um gerð viðauka við fjárhagsáætlun, áður en stofnað er til útgjalda eða skuldbindinga sem ekki er heimild fyrir í fjárhagsáætlun.

Greinilegt er á  því sem fram kemur hjá KPMG að sveitarfélagið hafi ekki brugðist við ábendingunum með því að fara að lögum.

Rebekka Hilmarsdóttir, bæjarstjóri segir í svari við fyrirspurn Bæjarins besta að ábendingin kom fram í skýrslum KPMG fyrir fjögur ár í röð: 2015, 2016, 2017 og 2018.

Hún segist ekki geta tjáð sig um það af hverju ekki var brugðist við ábendingunum. „Um mitt ár 2018 var farið í að rýna þetta verklag og unnið að því að bæta það.“ segir Rebekka. Hún vill þó benda á „að mörg sveitarfélög hafa ekki gætt að ákvæðum sveitarstjórnarlaga um gerð viðauka, það á ekki bara við um Vesturbyggð“  og segir hún að sendi sveitarstjórnar- og samgönguráðuneytið hafi sent leiðbeiningar til allra sveitarfélaga á árinu 2018 varðandi þessa framkvæmd.

Í bókun bæjarstjórnar Vesturbyggðar á síðasta fundi þar sem ársreikningar 2018 voru afgreiddir segir : „Bæjarstjórn Vesturbyggðar hefur þegar farið í endurskoðun á verklagi við vinnslu og gerð viðauka, þannig að viðaukar og staðfesting þeirra sé í samræmi við ákvæði sveitarstjórnarlaga og tryggt sé að framkvæmdir séu ekki hafnar fyrr en samþykktur viðauki við fjárhagsáætlun liggur fyrir.“

Landsnet kynnir  drög að nýrri kerfisáætlun Landsnets 2019 – 2028 á opnum kynningarfundi á Hótel Ísafirði á morgun , þann 21. maí kl. 15.00 – 17.00.

Á fundinum verður kerfisáætlunin kynnt og fundargestum gefst tækifæri á að spyrja og hitta fólkið sem vinnur að gerð áætlunarinnar og fá að heyra hvað verið er að gera til að tryggja leiðina inn í framtíðina.

Fundurinn er liður í fundarherferð Landsnet um landið.

Djúpið komið á framkvæmdaáætlun:

Stóru tíðindin eru þau að afhendingarstaður í Djúpinu er kominn á framkvæmdaáætlun.  Verkefnið snýr að uppsetningu á nýjum afhendingarstað í meginflutningskerfinu við Ísafjarðardjúp. Afhendingarstaðurinn verður tengdur við núverandi meginflutningskerfi í Kollafirði inn á Mjólkárlínu 1 (MJ1), þar sem byggt verður nýtt tengivirki.

Aðalvalkostur sem lagður er fram er að byggja 132 kV loftlínu, um 26 km langa, að afhendingarstað í Ísafjarðardjúpi (Miðdal) ásamt tengivirkjum á báðum endum.

Kostnaður er áætlað 2.275 milljónir króna og gert er ráð fyrir að framkvæmdir hefjist á síðari hluta árs 2022 og að þeim ljúki með spennusetningu seinni hluta árs 2024. Gert er ráð fyrir að lokafrágangur og lúkning fyrir verkefnið ásamt tengdum verkefnum verði í gangi fram á árið 2024.

Einnig var skoðaður jarðstrengur þessa leið og er kostnaður áætlaður heldur meiri eða 2.367 milljónir króna.

Um þessa tvo valkosti segir í skýrslunni:

Báðir valkostir uppfylla markmið framkvæmdarinnar sem er að auka afhendingaröryggi flutningskerfisins á Vestfjörðum. Einnig hefur verið framkvæmt mat á því hvernig valkostirnir uppfylla markmið raforkulaga og má sjá niðurstöður úr því mati á myndum 3-68 og 3-69. Báðir valkostir koma jafnvel út þegar horft er til markmiða um skilvirkni og öryggi. Valkostur 2, sem er jarðstrengskostur, kemur betur út þegar horft er til áreiðanleika afhendingar en valkostur 1, sem er loftlína, kemur betur út þegar horft er til gæða raforku og hagkvæmni.
Hvað varðar stefnu stjórnvalda um lagningu raflína, er valkostur 1 sá sem samræmist stefnunni betur, þar sem gert er ráð fyrir að línur í meginflutningskerfinu séu lagðar sem loftlínur, nema þegar sértstök viðmið eigi við.  Þau viðmið eiga ekki við í þessu tilfelli.
Það er því niðurstaða valkostagreiningar að Valkostur 1 er sá valkostur sem best uppfyllir öll markmið og samræmist best stefnu stjórnvalda um uppbyggingu flutningskerfisins og lagningu raflína.

Þingvellir eru komnir í sumarskrúða eins og sjá má á myndinni af Þingvallabænum og í gær var Öxarárfoss óvenju vatnsmikill og tilkomumikill. Þótt enn sé rétt miður maí voru fjölmargir erlendir ferðamenn í þjóðgarðinum. 

Opinn ársfundur Orkubús Vestfjarða verður haldinn á Hótel Ísafirði þriðjudaginn 21. maí kl. 12:00

Illugi Gunnarsson stjórnarformaður Orkubúsins og Elías Jónastansson, orkubússtjóri munu ræða málefni fyrirtækisins, kynna helstu stærðir í ársreikningi 2018 og það sem er á döfinni hjá fyrirtækinu.

Sigurður Friðleifsson, framkvæmdastjóri Orkuseturs flytur erindi um loftlagsmál, orkuskipti og rafbíla.

Fundarmönnum gefst kostur á að koma með fyrirspurnir til framsögumanna.

Ársfundurinn er öllum opinn og verður fundargestum boðið upp á súpu á staðnum.

Áætluð fundarlok eru um kl. 13:30

Valgerður Ingvadóttir segist ekki skilja hvernig ríkinu dettur í hug að setja fram kröfu um eignarhald á stórum hluta jarðarinnar Auðshaugs í Barðastrandarsýslu.  En kröfulýsing efnahags- og fjármálaráðherra fyrir hönd ríkisins  fyrir Barðastrandarsýslu liggur fyrir og hafa landeigendur frest til 16. ágúst 2019 til þess að bregðast við kröfum ríkisins. Að þeim fresti loknum verður málið tekið fyrir í Óbyggðanefnd, sem mun svo úrskurða um kröfuna. Úrskurði nefndarinnar má skjóta til dómstóla.

„Áður fyrr var til jörðin Auðnir, sem var úr Auðshaugi, en 1888 voru jarðirnar sameinaðar aftur.  Í þá daga bjó sýslumaður á Auðshaugi. Krafa ríksins er um það land Auðshaugs sem var innan til við Auðnir. Hér er fimmti ættliðurinn í röð sem býr á Auðshaugi“ segir Valgerður.

Hún segir að eigendur að Auðshaugi séu komnir með lögfræðing sem muni halda á málinu gagnvart Óbyggðanefnd. Valgerður segir að til séu nokkur gömul skjöl með greinargóðum landamerkjalýsingum jarðarinnar Auðshaugs og telur að þeim hafi öllum verið þinglýst.

Aðspurð um hvað geti skýrt kröfu ríkisins segir Valgerður að það verði að geta sér til um það, en henni sýnist að vatnsréttindin sem fylgja Kjálkafjarðará og vötnunum þar fyrir ofan verða líklegust til að skýra hana. Valgerði finnst það sérstakt að aðeins er gerð krafa í land úr jörðinni Auðhaugi en engar aðrar jarðir í nágrenninu.

Skipulagsstofnun er jákvæð í áliti sínu á fyrirhuguðu auknu laxeldi Arctic Fish og Arnarlax í sjó í Tálknafirði og Patreksfirði úr 3.000 tonnum í 17.500 tonn.

Forsaga málsins nær til ákvörðunar Úrskurðarnefndar um umhverfis- og auðlindamál (ÚUM) sem felldi úr gildi starfs- og rekstrarleyfi Arctic Fish og Arnarlax með tveimur úrskurðum 27. sept. 2018 og og 4. okt. 2018 þar sem ekki hefði verið framkvæmd valkostagreining í umhverfismatinu fyrir framleiðsluaukningunni á sínum tíma. Brást Alþingi við með því að setja lög um veitingu leyfa til bráðabirgða og gefa fyrirtækinu kost á að bæta úr umhverfismatinu. Hefur síðan verið unnið að viðbót við umhverfismatið þar sem framkvæmd er umrædd valkostagreining.

Var í þeirri greiningu tekið fyrir landeldi, eldi með ófrjóum lax, aðrar eldisaðferðir – regnbogasilungur og lokaðar eldiskvíar. Er það niðurstaða fyrirtækisins í viðbótarskýrslunni að umræddir aðrir kostir séu ekki fýsilegir hver þeirra af  tilgreinum ástæðum. Ennig var farið fram á breytingu á staðsetningu kvíanna í Tálknafirði og Patreksfirði í ljósi þeirrar reynsla sem komin var frá því umhverfismatið var gert fyrir þremur árum.

Það er álit Skipulagsstofnunar að ástæður fyrirtækisins fyrir því að útiloka aðra valkosti séu málefnalegar og gerir stofnunin ekki athugasemdir við þær.

Ýmsar umsagnir bárust um viðbótarfrummatsskýrsluna frá sveitarfélögum, stofnunum og samtökum sem lagst hafa gegn laxeldi í sjó svo sem landssambandi veiðifélagi, Náttúruverndarsamtökum Íslands og nokkrum veiðiréttarhöfum innan og utan Vestfjarða.

Náttúruverndarsamtök Vestfjarða, sem nýlega voru endurvakin, eru hluti af Náttúruverndarsamtökum Íslands, en þau samtök hafa staðið að nokkrum kærum og málshöfðunum fyrir dómstólum í því skyni að koma fiskeldinu í sjó á Vestfjörðum á kné.

Óttar Yngvason fór með málið fyrir hönd samtakanna og gerði kröfu um að framkvæmdin færi á byrjunarreit  með nýju umhverfismatsferli frá grunni. Því var Skipulagsstofnun ekki sammála og telur að viðbótarfrummatsskýrslan bæti úr þeim annmörkum sem ÚUA taldi vera á umhverfismatinu.

Málið fer núna að fengnu áliti Skipulagsstofnunar til Umhverfisstofnunar og Matvælastofnunar sem veita starfsleyfi og rekstrarleyfi. Umhverfisstofnun mun auglýsa umhverfismatið og gefa kost á athugasemdum. Vænta má niðurstöðu um leyfisveitingarnar eftir  um það bil 2 – 3 mánuði.