Sjávarútvegur: Fimm vestfirsk fyrirtæki á lista yfir 50 stærstu

Fiskistofa hefur birt lista yfir 50 stærstu fyrirtækin í sjávarútvegi hvað varðar úthlutun kvóta á fiskveiðiárinu sem hófst í gær.  Á listanum eru fimm vestfirsk fyrirtæki. Stærst þeirra er Hraðfrystihúsið Gunnvör hf á Ísafirði með 11.707 þorskígildistonn eða 3,31% útgefins kvóta. Er HG 11. stærsta fyrirtæki landsins og er með þriðjung af þeim kvóta sem Brim hf , kvótahæsta fyrirtækið er með.

Næst stærsta vestfirska fyrirtækið er Jakob Valgeir ehf í Bolungavík , sem er í 16. sæti og fær úthlutað 6.441 þígtonn sem er 1,82% af kvótanum. Þriðja stærsta vestfirska fyrirtækið er Oddi hf á Patreksfirði, sem er í 27. sæti á landinu, með 2.646 þígtonn og 0,75% kvótans.Fjórða kvótamesta vestfirska fyrirtækið er Þórsberg ehf á Tálknafirði sem er með 1.317 þígtonn. Norðureyri ehf  á Suðureyri er í 47. sæti á landsvísu og er fimmta stærsta vestfirska fyrirtækið með 1.210 þígtonn. Geta má þess að bolvíska fyrirtækið Salting ehf er í 38. sæti á listanum með 1.518 þígtonn , en það er skráð í Reykjavík.