Gönguhátíðin í Súðavík er haldin í ótrúlegri veðurblíðu og þriðja daginn í röð er hitinn að ná í 20 stigin segir Einar Skúlason forsvarsmaður göngunnar. Dagskráin hefur gengið vel, en þó varð áfall á fimmtudagskvöld þegar Bragi Thoroddsen sveitarstjóri í Súðavík datt við ána í þorpinu og slasaðist og þó að það hafi farið betur en á horfðist þá er hann úr leik á gönguhátíðinni. „Það er miður enda ætlaði hann í allar göngurnar og aðstoða við leiðsögn. Anna Lind skólastjóri Súðavíkurskóla mun hins vegar leiða flestar göngurnar og vaskur hópur aðstoðar hana.“
Fjöldi fólks mætti að brennunni við sjávarsíðuna í gærkvöldi og dagsgangan úr Önundarfirði fór vel fram þrátt fyrir mikinn hita.
Í morgun fór ríflega 20 manna hópur af stað í göngu yfir Súðavíkurfjallið, síðdegis kl. 17 verður söguganga um Súðavík og í kvöld verður útidansleikur við Raggagarð.
Í fyrramálið verður dagsganga að Galtarvita um Bakkaskarð. Svo verður ganga í Valagil kl. 11 og Ögurganga kl. 12. Um kvöldið verður alþjóðleg matarveisla með réttum frá Portúgal, Tælandi, Búlgaríu, Noregi og Þýskalandi.
Á mánudagsmorgun verður svo hin árlega morgunganga á Kofra.
