Strandveiðar: 3.137 tonn í maí og júní á Vestfjörðum

Alls bárust 3.137 tonn að landi af 271 strandveiðibát á Vestfjörðum í maí og júní mánuðum samkvæmt samantekt Landssambands smábátaeigenda. Landað var afla í 12 höfnum í fjórðungnum af 14.

Patreksfjörður var aflahæst á Vestfjörðum með 847 tonn á þessu tímabili og var jafnfram hæsta höfnin á landinu. Bolungavíkurhöfn er í öðru sæti með 732 tonn. Þessar tvær hafnir voru langhæstar. Það voru einnig langflestir bátar sem lönduðu í þessum höfnum ,72 bátar á Patreksfirði og 58 í Bolungavík.

Fimm Vestfjarðahafnir eru meðal 10 hæstu hafnanna á landinu. Patreksfjörður var sem fyrr segir aflahæst, Bolungavík í 4. sæti og í 8.-10. sæti voru Norðurfjörður, Tálknafjörður og Suðureyri.