Þórdís Sif Sigurðardóttir verður næsti bæjarstjóri Vesturbyggðar. Samkomulag hefur náðst við hana og hefur hún störf 1. september næstkomandi. Gengið verður formlega frá ráðningunni á næsta fundi bæjarráðs.
Jón Árnason, forseti bæjarstjórnar segir að eining sé um ráðninguna.
Þórdís var bæjarstjóri í Borgarbyggð 2020-2022 og þar áður bæjarritari í Ísafjarðarbæ.
“Ég er virkilega spennt að flytja vestur, kynnast nýju fólki og verða hluti af nýju samfélagi en ég hef miklar taugar til Vestfjarða. Ég hlakka til að vinna fyrir Vesturbyggð í öllum þeim spennandi verkefnum sem eru framundan í góðu samstarfi við öfluga bæjarfulltrúa, starfsfólk og íbúa. Uppbygging í atvinnulífinu og íbúafjölgun kallar á ólíka verkefni í innviðauppbyggingu sem verður skemmtilegt að taka þátt í og vinna áfram að frekari umbótum í sveitarfélaginu. Ég er þakklát fyrir það traust sem mér er sýnt með ráðningunni.” segir Þórdís Sif Sigurðardóttir.
