Nemanja valinn bestur á lokahófi

Lokahóf Körfuknattleiksdeildar Vestra var haldið í beinu framhaldi af aðalfundi deildarinnar þann 24. apríl síðastliðinn. Sú nýbreytni var viðhöfð að elstu iðkendum deildarinnar í yngri flokkum, frá 9. flokki upp í drengja- og stúlknaflokk, var boðið til hófsins.

Yngvi Páll Gunnlaugsson yfirþjálfari veitti viðurkenningar. Besti leikmaðurinn var valinn Nemanja Knezevic en hann var jafnframt valinn besti varnarmaður liðsins. Nebojsa Knezevic var valinn besti sóknarmaðurinn, Hugi Hallgrímsson besti ungi leikmaðurinn, Hilmir Hallgrímsson fékk nafnbótina dugnaðarforkurinn og Egill Fjölnisson hlaut viðurkenningu fyrir mestu framfarirnar. Sérstök verðlaun, „Járnmaðurinn“ hlaut Gunnlaugur Gunnlaugsson fyrir ósérhlífið starf í þágu félagsins en þess má einnig geta að Gunnlaugur var fyrr um kvöldið kosinn sem varamaður í stjórn deildarinnar.

Að lokinni verðlaunaafhendingu veitti stjórn deildarinnar Guðmundi Kort Einarssyni lítinn þakklætisvott fyrir óeigingjarnt starf í þágu körfuknattleiks á Ísafirði en Guðmundur flytur suður á Akranes nú í vor. Þau eru ófá verkin sem Guðmundur hefur gengið í fyrir deildina í gegnum tíðina. Guðmundur hefur setið í stjórn deildarinnar sem varamaður undanfarin ár og sinnt fjölmörgum verkefnum á þeim vettvangi sem verða seint fullþökkuð. Hans verður þó líklega einna mest saknað af vettvangi Jakans-TV en hann hefur undanfarin ár borið uppi metnaðarfullar útsendingar Jakans af einstakri elju og dugnaði.

 

Athugasemdir

athugasemdir