Eftirlitsnefnd um fjármál sveitarfélaga, EFS, gerir athugasemdir við fjárhagsáætlun Tálknafjarðar fyrir 2023. Í bréfi nefndarinnar til sveitarstjórnar dags 28.2. 2023 segir að fjárhagsáætlunin uppfylli ekki öll lágmarksviðmið eftirlitsnefndar fyrir A-hluta.
Eftirlitsnefndin leggur áherslu á það við sveitarstjórn að nauðsynlegt sé að fara vel yfir fjárhagslegar forsendur sveitarfélagsins til að ná lágmarksviðmiðum EFS.
Nettóskuldir sveitarfélagsins eru 149,5% af tekjum og skal þá rekstrarniðurstaða sveitarfélagsins vera jákvæð en er samkvæmt fjárhagsáætluninni halli upp á 17,2% af tekjum. Þá á framlegð að vera jákvæð um 14,9% en er neikvæð um 3,9% og loks á veltufé frá rekstri að vera jákvætt um 7,5% af tekjum en er neikvætt um 6,7%.
Sveitarfélögum er samkvæmt bráðbirgðaákvæði VII í sveitarstjórnarlögum nr. 138/2011 heimilt að víkja frá skilyrðum um jafnvægisreglu og skuldareglu út árið 2025 en EFS bendir sveitarstjórn á að árið 2026 þarf að uppfylla framangreind skilyrði.
Bréfið var lagt fram í sveitarstjórn og rætt en ekki brugðist að öðru leyti við erindinu.
