Sannkallað gullfé ættað úr Reykhólasveit og af Ströndum

Sannkallað gullfé hefur fundist á bænum Þernunesi í Reyðarfirði eins og Bæjarins besta greindi frá í gær.

Kindurnar eru sex talsins og bera gen sem er viðurkennt í Evrópusambandinu sem vörn gegn riðu. Þetta er í fyrsta sinn sem arfgerðin finnst hér á landi þrátt fyrir mikla leit. Hún er talin geta tryggt sigur í baráttunni gegn riðu. Þetta er sama arfgerð og unnið hefur verið með í löndum Evrópusambandsins með góðum árangri.

Féð eru kollótt og rekur ættir sínar meðal annars í kollótt fé í Reykhólasveit og á Ströndum.

Í tilkynningu segir að þetta gefi miklar vonir um að ARR arfgerðin verðmæta gæti fundist víðar á landinu. Nú er að hefjast stórátak í greiningu og verða um 15 þúsund gripir greindir í vetur. Í tilkynningunni segir að það verði áskorun að koma ARR arfgerðinni sem hraðast inn í stofninn án þess að draga um of úr fjölbreytileika hans.