„Ég hef hvatt fiskeldisfyrirtækin til að kunna sér hóf. Það þarf að byggja greinina upp á ábyrgan hátt og ekki líta á vöxtinn sem kapphlaup. Ef skynsemin ræður ferðinni, reglurnar eru skýrar og ekki vaðið fram þá höfum við alla burði til að gera Ísland að mjög öflugri fiskeldisþjóð. Við þurfum ekki að finna upp hjólið og getum lært mikið af Norðmönnum og þeim stífu reglum og ströngu kröfum um að búnað í fiskeldi sem þar gilda“

Þetta segir Þorgerður Katrín Gunnarsdóttir sjávarútvegs- og landbúnaðarráðherra í samtali við 200 mílur, sjávarútvegsblað Morgunblaðsins í dag.

„Eins og staðan er í dag þurfum við að fá skýrari sýn á framtíð fiskeldis á Íslandi. Gera þarf mjög ítarlegar kröfur umhverfisvernd og ábyrgan vöxt. Fiskeldið má alls ekki skaða lífríkið í fjörðunum og alls ekki skemma villta stofna auk þess að eðlilegt er að gera kröfu um auðlindagjald í einhverju formi,“ segir sjávarútvegsráðherra í viðtalinu.

Í samtali við 200 mílur segir sjávarútvegs og landbúnaðarráðherra ennfremur æskilegt að gjaldið renni að miklu eða öllu leyti til þeirra sveitarfélaga þar sem fiskeldið er rekið.

„Norðmenn líta svo á að þeir hafi gert mistök með því að láta þau gjöld sem tekin voru af fiskeldinu ekki skila sér í meira mæli til þeirra sveitarfélaga þar sem fiskeldið fer fram“, segir Þorgerður Katrín Gunnarsdóttir sjávarútvegs- og landbúnaðarráðherra.

Smári

Gistinætur á hótelum í febrúar voru 331.800 sem er 21% aukning miðað við febrúar 2016. Gistinætur erlendra gesta voru 89% af heildarfjölda gistinátta í mánuðinum en þeim fjölgaði um 21% frá sama tíma í fyrra á meðan gistinóttum Íslendinga fjölgaði um 18%.

Flestar gistinætur á hótelum í febrúar voru á höfuðborgarsvæðinu eða 227.100 sem er 13% aukning miðað við febrúar 2016. Um 68% allra gistinátta voru á höfuðborgarsvæðinu. Næstflestar voru gistinætur á Suðurlandi eða um 48.200. Erlendir gestir með flestar gistinætur í febrúar voru Bretar með 107.600 gistinætur, Bandaríkjamenn með 69.900 og Þjóðverjar með 20.300, en íslenskar gistinætur í febrúar voru 37.400.

Í gögnum Hagstofunnar eru gistinætur á Vestfjörðum og Vesturlandi taldar saman. Þeim fjölgaði um 34% í febrúar samanborið við febrúar 2016. Fjölgun gistinátta er enn skarpari sé litið yfir lengra tímabil. Á tímabilinu mars 2015 til febrúar 2016 voru gistinætur á Vestfjörðum og Vesturlandi 124.248, en á tímabilinu mars 2016 til febrúar 2017 voru þær 176.357 eða fjölgun um 42%.

Á tólf mánaða tímabili frá mars 2016 til febrúar 2017 var heildarfjöldi gistinátta á hótelum á Íslandi 3.969.500 sem er 33% aukning miðað við sama tímabil árið áður.

Smári

Áform ríkisstjórnarinnar um að hækka ferðaþjónustuna úr lægra virðisaukaskattþrepi upp í það hærra kemur eins og blaut tuska framan í ferðaþjónustufyrirtæki landsins. Þetta kom fram á neyðarfundi Samtaka ferðaþjónustunnar í gær. Í ályktun sem samþykkt var á fundinum segir að gengisstyrking og kostnaðarhækkanir stefni nú þegar afkomu fyrirtækja í ferðaþjónustu í mikla hættu, en með boðuðum skattahækkunum ríkisstjórnarinnar versni samkeppnishæfni Íslands til mikilla muna. Í ályktuninni segir að afleiðingarnar verða alvarlegastar fyrir landsbyggðina sem á nú þegar undir högg að sækja þegar kemur að ferðaþjónustu. Samkvæmt upplýsingum Samtökum ferðaþjónustunnar fer Ísland í annað sæti yfir hæstan virðisaukaskatt á ferðaþjónustu í heiminum komi skattahækkunin til framkvæmda, en dönsk ferðaþjónustufyrirtæki greiða 25 prósenta virðisaukaskatt.

„Ferðaþjónusta er í eðli sínu alþjóðleg atvinnugrein. Íslensk ferðaþjónustufyrirtæki starfa því á alþjóðlegum markaði og í samkeppni við erlenda áfangastaði þar sem ferðaþjónustan er almennt í lægri þrepum virðisaukaskattskerfisins. Það hefur sýnt sig að þau lönd sem eru t.a.m. með gististaði í efri skattþrepum hafa lotið í lægra haldi í samkeppni við aðra áfangastaði. Tillögur um hækkun á virðisaukaskatti vega þannig alvarlega að samkeppnishæfni Íslands,“ segir í ályktun Samtaka ferðaþjónustunnar.

Smári

Það verður norðaustanátt á Vestfjörðum í dag 5-10 m/s. Að mestu leiti verður þurrt, en smá éljagangur á norðanverðum Vestfjörðum er fram kemur í spá Veðurstofu Íslands. Það hvessir og bætir í úrkomu í nótt og má gera ráð fyrir 10-18 m/s í fyrramálið, en minnkandi vindur og stöku él annað kvöld. Hiti verður frá frostmarki að fjórum stigum. Í veðurspá fyrir landið í heild sinni á sunnudag er gert ráð fyrir austan og síðar suðaustan 13-20 m/s með slyddu og síðar talsverðri rigningu, hvassast verður syðst á landinu. Úrkomulítið um landið norðaustanvert. Hlýnar í veðri og hiti 3 til 8 stig um kvöldið. Á mánudag kólnar að nýju.

Það eru hálkublettir, hálka eða snjóþekja á nokkrum fjallvegum á Vestfjörðum en autt á láglendi.

annska@bb.is

Hún ber aldurinn vel, Ísborg ÍS 250, þrátt fyrir að eiga ekki nema tvö ár í sextugt. Ísborgin hefur verið í slipp Njarðvík og var sett niður í gær. „Það var verið að mála og gera klárt,“ segir Arnar Kristjánsson útgerðarmaður. Arnar segir að fljótlega verði haldið á úthafsrækjuveiðar. Ísborgin var smíðuð í A-Þýskalandi árið 1959, einn hinna svokölluðu tappatogara. Alls voru smíðuð 12 skip fyrir Íslendinga af þessari gerð og Ísborg er það eina sem enn er í útgerð.

Smári