Í síðasta mánuði varð Dagur Benediktsson frá Ísafirði fimmfaldur Íslandsmeistari í skíðagöngu, sem er einstæður árangur. Á bak við slíkt liggur mikil ástundun en líka skipulag sem hefur verið fylgt eftir. Gústaf Baldvinsson framkvæmdastjóri Seagold Ltd., sem er sölufélag Samherja í Bretlandi segir frá því á vefsíðu Samherja að Dagur hafi kom að máli við hann árið 2018 og óskað eftir samtali. „Ég kannaðist lítillega við drenginn þar sem hann er Ísfirðingur en þangað á ég mikil tengsl. Við settumst niður og Dagur falaðist eftir styrk frá fyrirtæki okkar í Englandi Seagold Ltd., til þess að verða frambærilegur keppnismaður á gönguskíðum. Hann kynnti fyrir mér ákveðnar hugmyndir um það hvað hann þyrfti að gera til að ná því markmiði. Í stuttu máli ætlaði hann að helga sig skíðagöngunni næstu árin.“
Gústaf segir að Dagur lagði fyrir hann langtíma áætlun sem honum fannst djörf. „Við hjá Seagold ákváðum að ganga til liðs við Dag með því að styðja hann og óskaði ég eftir því að hann sendi mér reglulega æfingaáætlanir, upplýsingar um gengi í mótum og fl. Síðastliðin 5 ár hefur Dagur gert þetta af mikilli samviskusemi og skýrt okkur hjá Seagold ítarlega frá því hvernig honum hefur gengið að ná settu marki. Það má því segja að við höfum fengið að taka þátt í að sjá skíðagarpinn Dag þroskast og dafna.“
Niðurstaðan liggur fyrir, fimm árum síðar er Dagur fimmfaldur Íslandsmeistari.
Seagold Ltd. er sölufélag Samherja í Bretlandi sem var stofnað 1996 og hefur Gústaf Baldvinsson verið framkvæmdastjóri þess frá upphafi.
