Frá því er greint á vefsíðu Hraðfrystihússins Gunnvör hf í Hnífsdal að skipsfélagarnir Kristján Karlsson vélstjóri og Halldór L. Sigurðsson netamaður hafi lokið sínum síðasta túr á frystitogaranum Júlíusi Geirmundssyni ÍS 270 eftir áratuga störf um borð.
Kristján hóf störf sem vélstjóri á skipinu 13. nóvember 1989 þegar það kom nýsmíðað til landsins og hefur því starfað þar um 33 ára skeið. Sjómennsku hefur hann stundað í 52 ár því áður var hann m.a. á Sigurey, Guðmundi í Tungu og Selá.
Halldór hefur undanfarin 17 ár verið netamaður á Júlíusi, en sjómennskan spannar 42 ár því áður var hann m.a. á Hrafni, Sléttanesi og Framnesi.
Fyrirtækið þakkar þessum starfsmönnum sínum fyrir vel unnin störf undanfarna áratugi og óskum þeim alls hins besta í framtíðinni.
