Arnarlax: Gáfu 35 björgunarvesti fyrir börn

Á meðfylgjandi mynd má sjá Rebekku Hilmarsdóttur bæjarstjóra Vesturbyggðar, Björn Hembre, forstjóra Arnarlax og Silju Baldvinsdóttur gæðastjóra Arnarlax við afhendingu vestanna, en sonur Silju, Magnús Kristján, mátaði eitt björgunarvestanna sem verða framvegis til taks fyrir hann og önnur börn sem koma til dorga á hafnarbakkanum.

Hafnaryfirvöld á Tálknafirði og í Vesturbyggð, sem Patreksfjörður, Bíldudalur og Barðaströnd teljast til, fengu í gær afhent 35 björgunarvesti að gjöf. Vestin eru sérhönnuð fyrir börn og tilgangurinn er að auka öryggi hafnarsvæðanna í sveitafélögunum. Hafnir eru algeng leiksvæði barna í sjávarbyggðum en geta um leið reynst þeim mjög hættulegar.

Nýju barnavestin uppfylla ströngustu staðla og vottanir um öryggi en þau verða geymd á áberandi stað í merktum körum á hafnarsvæðum sveitarfélagannasegir í fréttatilkynningu.

Það er fiskeldisfyrirtækið Arnarlax sem gaf vestin en fyrirtækið er umsvifamikið á Vestfjörðum og er með hafnsækna starfsemi á þremur ólíkum stöðum í landshlutanum.

„Með þessari gjöf viljum við stuðla að öryggi barna á hafnarsvæðunum en mikið er um að ungir veiðimenn leggi leið sína á bryggjurnar, ekki síst á sumrin og á fallegum vordögum eins og undanfarið. Á sama tíma er þar oft mikil umferð, það getur verið hált og ekki víst að fólk verði þess alltaf var ef einhver fellur í höfnina,“ segir Silja Baldvinsdóttir gæðastjóri Arnarlax.

DEILA