Fulltrúar frá Íslenskum verðbréfum, Fisherman, Íslandssögu og Klofningi, mættu til fundar við bæjarráð í fyrradag, í gegnum fjarfundarbúnað, til að ræða mögulega staðsetningu sláturhúss á Suðureyri fyrir slátrun eldisfisks frá ÍS-47, og Hábrún. Kynntu þeir klasaverkefnið á Suðureyri sem nefnist Brjóturinn.
Tilgangur verkefnisins er að greina hvernig best væri að efla og tengja saman laxeldi, fiskvinnslu og ýmsa fiskeldistengda þjónustu á Suðureyri.
Sérstaklega var horft til þeirra tækifæra sem eru á Suðureyri í Súgandafirði og þann mögulega ávinning sem næðist í tengslum við þriggja hektara landfyllingu við Brjótinn vestan við bæinn. Vinnuheiti þessa verkefnis er einmitt „Brjóturinn – Klasaverkefni á Suðueyri“ og vísar til staðsetningarinnar.
Í inngangi skýrslunnar segir:
„Ekkert laxeldi er fyrirhugað í Súgandafirði en á móti er framúrskarandi aðstaða á Brjótnum fyrir laxaslátrun og framhaldsvinnslu á laxi. Það getur einnig skipt máli fyrir önnur nálæg eldissvæði á borð við Önundarfjörð og Ísafjarðardjúp þar sem umræða hefur verið um að byggja upp laxeldi á forsendum lífrænnar ræktunnar. Spennandi nýtt
vaxtarsvið laxeldis þar sem afurðaverð er mun hærra en sést hefur í hefðbundnu laxeldi.“
Helstu niðurstöður skýrslunnar eru:
Landfylling við Brjótinn
Fisherman gekk frá samningi við Ísafjarðarbæ um uppbyggingu á landfyllingu við Brjótinn á Suðureyri í apríl 2020 og liggur framkvæmdaleyfi fyrir í dag.
Gert er ráð fyrir 30.000 m2 landfyllingu sem verður framkvæmd í allt að þremur áföngum. Samtals þarf um 100.000 m3 af jarðefni til uppfyllingar. Mest af efninu kemur úr skeringum sunnan við landfyllinguna.
Framkvæmdin er unnin á vegum Fisherman sem mun á sinn kostnað annast nauðsynlega landfyllingu á svæðinu og kosta og hafa umsjón með vegagerð um svæðið. Þá mun framkvæmdaaðilinn einnig leggja rafstreng og vatnslagnir frá svæðinu til skilgreindra tengipunkta á Suðureyri og mun jafnframt ganga frá fráveitukerfi fyrir svæðið. Á móti kemur að Ísafjarðarbær fellur frá öllum gjöldum sem vanalega tengjast þessum þáttum.
Gert er ráð fyrir að landfyllingin verði gerð í nokkrum skrefum í takt við eftirspurn eftir lóðum undir iðnaðar- og atvinnuhúsnæði.
Þá er kveðið á í samkomulaginu að uppbygging hafnarsvæðisins í kringum uppfyllinguna sé háð framlögum ríksisins til hafnarmála og framkvæmda í höfnum.
Ísafjarðarbær mun ekki hefja hafnarframkvæmdir á svæðinu nema með aðkomu ríksins. Samningsaðilar voru sammála að vinna sameiginlega að því að tryggja aðkomu ríkisins að nauðsynlegum framkvæmdum svo fljótt sem auðið er.
Næstu skref
- Ganga frá samkomulagi við þá aðila sem hafa áhuga á að byggja upp starfsemi á iðnaðarsvæðinu við Brjótinn.
- Á grundvelli þess samkomulag þarf að leita til Ísafjarðarbæjar um stuðning við að flýta hafnargerð í tengslum við Brjótinn.
- Þegar það samkomulag liggur fyrir er hægt að hefja framkvæmdir með það fyrir augum að svæðið verði tilbúið til uppbyggingar haustið 2022.
