Patreksfjörður: Fjölval verður opnuð aftur á fimmtudaginn

Hópsmitin á Patreksfirði hafa áhrif á starfsemi verslunarinnar Fjölval. Starfsmaður verslunarinnar hefur greinst með Covid smit og fara allir starfsmenn verslunarinnar í test í fyrramálið og hafa verið settir í sóttkví þar til niðurstaða liggur fyrir.

Samkvæmt nýjustu upplýsingum er starfsfólkið sem hefur umgengist hvert annað frá síðasta föstudag komið í sóttkví fram á laugardag. Búðin verður lokuð á morgun, miðvikudag.

Haukur Már Sigurðsson eigandi Fjölvals segir að fundin verði lausn á mönnum búðarinnar þannig að unnt verði að opna á fimmtudaginn.

„Við gætum þurft að kalla til aðstoð frá einstaklingum sem eru ekki í sóttkví til að halda búðinni opinni, þar sem við erum nánast öll úr leik. Sjái einhverjir sér fært að aðstoða, vinsamlegast látið vita með kommenti hér á síðunni.“

Haukur Már segir að það sem verið er að hugsa er eftirfarandi:

„Að verslunin verði opin 3 til 4 tíma á dag. Og að öll afgreiðsla fari fram í gegnum búðina en ekki með heimsendingum frá búðinni, það mun þýða að allir þurfa að hjálpast að og fara í verslun fyrir þá sem eru í sóttkví og eða þá sem almennt eiga ekki heimangengt. Við munum ekki hafa mannskap til að taka við símtölum, taka til pantanir og keyra út, það er því miður staðan.“

DEILA