Birt hefur verið viðbót við svonefnda innviðagreiningu Vesturbyggðar. Það er verkfræðistofan Efla sem vann viðbótarskýrsluna. Frestur er gefin til að senda inn athugasemdir og/eða ábendingar við viðaukann til og með 15. ágúst nk. Hægt er að senda athugasemdir á netfangið vesturbyggd@vesturbyggd.is og merkja: Athugasemdir við innviðagreiningu.
Greinndar eru tvær sviðsmyndir, eins og það heitir. Annars vegar þar sem gert er ráð fyrir því að starfsemi við slátrun og vinnslu á eldislaxi hætti og hins vegar að þar sem sú starfsemi byggist áfram upp en mögulega annars staðar innan sveitarfélagsins.
Fram kemur í skýrslunni að meðallaun starfsmanna í fiskeldi hafi vaxið umfram meðallaun annarra atvinnugreina á
undanförnum árum, en á árinu 2019 var launakostnaður á hvern starfsmann í fiskeldi rúmar 9,6 m.kr. samanborið við 8 m.kr. að meðaltali í viðskiptahagkerfinu í heild.
Heimild til framleiðslu af frjóum laxi í sjókvíum í Patreksfirði, Tálknafirði og Arnarfirði er 29.000 tonn en gæti farið upp í 40.000 miðað við áhættumat Hafrannsóknarstofnunar.
Niðurstaða fyrri sviðsmyndarinnar, sem er að slátrun yrði hætt í sveitarfélaginu en eldið héldi áfram, er að fólksfækkun yrði í kringum 130 manns í sveitarfélaginu. Tekið er fram að óvissa ríkir um áhrifin af fækkunnni á afleidd störf.
Seinni sviðsmyndin er athugun á áhrifum þess að flytja slátrunina til innan sveitarfélagsins. Bornir eru saman þrír kostir. Í fyrsta lagi óbreytt staða með slátrun á Bíldudal. Í öðru lagi flutningur innan Bíldudals á nýja landfyllingu og loks að flytja starfsemina til Patreksfjarðar.
Þar er núverandi staðsetning talin lakasti kosturinn þar sem litlir möguleikar eru á stækkun vinnslunnar. Í niðurstöðukafla skýrslunnar segir:
„Báðar nýju staðsetningarnar sem skoðaðar voru eru vænlegri en núverandi staðsetning hvað er stækkun starfseminnar varðar og ekki er mikill munur á innviðagreiningu þeirra staðsetninga. Staðsetning lóðar fremst á eyrinni á Patreksfirði felur hins vegar í sér hagræði sem er ekki á Strandgötu 9 á Bíldudal. Auk þess er flöt eyrin ekki fullnýtt í nálægð við
fyrirhugaða lóð sem felur í sér sveigjanleika til framtíðar.“