Breiðuvíkurkirkja er í Patreksfjarðarprestakalli í Vestfjarðaprófastsdæmi.
Breiðavík er bær og kirkjustaður við samnefnda vík í Rauðasandshreppi. Þar var bænhús framan af öldum en sóknarkirkjan var sett 1824. Henni var þjónað frá Sauðlauksdal, en nú frá Patreksfirði.
Kirkjan sem nú stendur í Breiðavík var vígð árið 1964. Munir úr gömlu kirkjunni eru á Minjasafni Egils Ólafssonar að Hnjóti.
Kirkjugarðurinn er nokkuð frá nýju kirkjunni, neðan við Breiðavíkurbæinn.
Kirkjan í Breiðavík er sú kirkja sem stendur vestast á Íslandi og þar með í Evrópu. Söfnuðinum sem orðinn er býsna fámennur er þjónað frá Patreksfirði.
