Ísafjarðarbær: Í listinn sat hjá við ráðningu sviðsstjóra

Frá bæjarstjórnarfundi haustið 2019. Mynd: Kristinn H. Gunnarsson.

Hvergi kemur fram í fundargerð bæjarstjórnar síðasta fimmtudag hver hafi verið ráðinn sviðsstjóri skóla- og tómstundasviðs bæjarins. Bókað er að tillaga bæjarstjóra hafi verið samþykkt 5:0 en ekki kemur fram um hvern tillagan var og í birtri tillögu bæjarstjóra er ekkert nafn að finna.

Þrír aðalmenn voru fjarverandi. Það voru Sjálfstæðismennirnir Daníel Jakobsson og Hafdís Gunnarsdóttir og Í listamaðurinn Sigurður Jón Hreinsson.

Ráðningin var samþykkt mótatkvæðalaust en Í listinn lagði fram bókun þar sem fram kemur að ekki hafi verið tekið tillit til athugasemda Í-listans, hvorki varðandi viðtöl né skrifleg svör við verkefni/spurningum. 

„Þar sem fulltrúum Í-listans gafst ekki kostur á að leggja mat á umsækjendur í viðtali eða með því að rýna þeirra hugmyndir um framtíðarsýn skóla- og tómstundasviðs, teljum við okkur ekki geta lagt mat á það hver af umsækjendunum er hæfastur til að gegna stöðu sviðsstjóra skóla- og tómstundasviðs. Við munum því ekki taka þátt í atkvæðagreiðslunni.“

DEILA