Tillaga stjórnar Fjórðungssambands Vestfirðinga um raforkumál var samþykkt með yfirgnæfandi atkvæðamun á Fjórðungsþinginu sem lauk á laugardaginn.
Í samþykktinni er fagnað því að áformað er að auka raforkuframleiðslu á Vestfjörðum með sjálfbærri nýtingu vatns og vinds. Fagnað er því að nýr tengipunktur raforku í Ísafjarðardjúpi er komin á framkvæmdaáætlun Landsnets og segir í ályktuninni að þar með sé komið í farveg baráttumál Vestfirðinga um hringtengingu flutningskerfis raforku á Vestfjörðum eða svokallaðri N-1 tengingu. Þá segir:
„Bein áhrif þessa verkefnis verða úrbætur á afhendingaröryggi raforku á norðanverðum Vestfjörðum og Ströndum með nýjum flutningslínum, en óbeint inn á sunnanverða Vestfirði með aukinni flutningsgetu.“
Hér var verið í raun að álykta um Hvalárvirkjun og var beðið með nokkurri eftirvæntingu eftir afstöðu sveitarstjórnarmanna á Vestfjörðum. Atkvæðagreiðsla var hins vegar í góðu samæmi við þau sjónarmið sem fram komu á fundi sveitarstjórnarmanna með alþingismönnum kjördæmisins í Flókalundi í lok september. Með tillögunni greiddu 16 og einn var á móti. Það var Jón Jónsson, Strandabyggð sem greiddi atkvæði gegn ályktuninni og Jón Gísli Jónsson, oddviti í Strandabyggð sat hjá.
