Þann 13. apríl s.l. hélt Harmonikufélag Vestfjarða aðalfund sinn fyrir nýliðið starfsár, í Nausti, sal eldriborgara á Hlíf 2.
Þar kom fram að starfið hefur verið með rólegra móti, árið eftir vel heppnað Landsmót S.Í.H.U. sem haldið var hér á Ísafirði 2017 af Harmonikufélagi Vestfjarða.
Í skýrslu stjórnar er sagt frá haust-aðalfundi Sambands íslenskra harmonikuunnenda sem haldin var á Akureyri 5. til 7. október 2018, fulltrúar félagsins voru Karitas Pálsdóttir og Magnús Reynir Guðmundsson.
Sagt er frá samstarfi Harmonikufélagsins við Tónlistarskóla Ísafjarðar sem fór af stað s.l. haust þegar Rún Esradóttir tók við kennslu á harmoniki, stjórnin heimsótti skólann og kynnti sér hljóðfærakostinn, sem þeir Baldur Geirmundsson og Villi Valli töldu viðunandi, Baldur hafði áður yfirfarið hljóðfæri fyrir skólann.
Stjórn Harmonikufélgsins tók þá ákvörðun að styrkja Tónlistarskóla Ísafjarðar um kr. 200.000.- ætlað til greiðslu skólagjalda fyrir nema í harmonikunámi og vonumst við til að það hjálpi og hvetji einhverja til námsins. Ingunn Ósk Sturludóttir skólastýra og þær Dagný Arnalds og Rúna Esradóttir veittu viðtöku gjafabréfs þessu til staðfestingar.
Mynd: aðsend.
Harmonikusnillingarnir Baldur Geirmundsson og Villi Valli ásamt Magnúsi Reyni bassaleikara láta bæjarbúa njóta tónlistarinnar við ýms tækifæri, sem þeir og gerðu á aðalfundinum. Einnig eru Harmonikukarlarnir og Lóa, á Þingeyri í fullu fjöri og æfa stíft.
Það er af aðalfundinum að segja að skýrsla stjórnar og reikningar voru samþykktir. Stjórn félagsins var endurkjörin, en hana skipa: Hafsteinn Vilhjálmsson formaður, Magnús Reynir varaformaður, Hólmgeir Pálmason gjaldkeri, Sigríður Gunnarsdóttir ritari, og Messiana Marsellíusdóttir meðstjórnandi.
Undir liðnum önnur mál var rætt um að stefna á ferðalag að hausti og eru allar hugmyndir um áfangastað vel þegnar. Næsta Landsmót S.Í.H.U. Sambands íslenskra harmonikuunnenda verður haldið í Stykkishólmi 2020 af Félagi harmonikuunnenda í Reykjavík.
Þingeyri – dagur harmonikunnar á laugardaginn
Dagur harmonikunar er fyrsti laugardagur í maí sem núna ber upp á 4. Harmonikukarlarnir og Lóa bjóða að vanda til samkomu í Félagsheimilinu á Þingeyri og kvenfélagið sér um kaffiveitingar. Aðgangur ókeypis.
Sjáumst sem flest.
