Vettvangsskóli Háskólaseturs Vestfjarða á Reykhólum

Vettvangsskóli Háskólaseturs Vestfjarða og Nordplus-samstarfsnetsins SuWaCo (Sustainable Waters and Coastal Bodies) heimsótti Reykhólasveit fyrir helgi. Í vettvangsskólanum fást nemendur við nýsköpunarverkefni sem tengjast hafinu á einn eða annan hátt. Sjónir nemenda beindust einkum að sjávargróðri enda eru Reykhólar höfuðstaður nýtingar þangs og þara á Íslandi.

Nemendurnir unnu í heila viku undir handleiðslu Maríu Maack á Reykhólum að nýtingu sjávargróðurs og opnuðust augu þeirra fyrir ýmsu sem er lítið sem ekki notað í dag. Eitt verkefni snerist um „afeitrun“ skólps með hjálp þörunga, annar hópur þróaði hugmynd um ráðgjafafyrirtæki til að leiðbeina bændum og sveitarfélögum varðandi notkun þörunga til að uppfylla staðla Evrópusambands um skólp. Enn annar hópur vann að hugmynd um fyrirtæki sem sem myndi framleiða einnota hnífapör úr agar sem unnið er úr þangi.

Vettvangsskólinn er hluti af Nordplus-samstarfsneti SuWaCo (Sustainable Waters and Coastal Bodies), þar sem, auk Háskólaseturs Vestfjarða, taka þátt fagháskólinn Novia i Finnlandi, Eesti maaülikool, sem er Landbúnaðarháskóli Eistlands, Aleksadras Stulginskis-háskóli í Litháen og landbúnaðarháskóli Lettlands.

bryndis@bb.is