Ríkisstjórnin fjallaði á fundi sínum í morgun um stefnu og áætlun félags- og jafnréttismálaráðherra gegn einelti, kynferðislegri áreitni, kynbundinni áreitni, ofbeldi og annarri ótilhlýðilegri háttsemi, sem gildir fyrir öll ráðuneyti Stjórnarráðsins.

Katrín Jakobsdóttir, forsætisráðherra, lagði á ríkisstjórnafundinum til að allir ráðherrar hvetji til kynningar og fræðslu um gildandi stefnu og áætlun gegn einelti, kynferðislegri áreitni, kynbundinni áreitni, ofbeldi og annarri ótilhlýðilegri háttsemi. Forsætisráðherra lagði jafnframt til að allir ráðherrar hvetji til þess að gerðar verði kannanir á hugsanlegum tilvikum kynferðislegrar áreitni, að jafnaði árlega, í hverju ráðuneyti, að unnið verði með niðurstöður þeirra og tryggt að í hverju ráðuneyti liggi fyrir skýrt ferli viðbragða þegar kvartað er undir kynferðislegri áreitni.

Gildandi áætlun var samþykkt innan Stjórnarráðsins sl. vor og var unnin í samræmi við ákvæði reglugerðar um aðgerðir gegn einelti, kynferðislegri áreitni, kynbundinni áreitni, ofbeldi og annarri ótilhlýðilegri háttsemi. Stuðst verður við áætlunina í öllum tilvikum þar sem starfsmenn eru grunaðir um að leggja aðra starfsmenn, eða aðra sem áætlunin tekur til, í einelti eða áreita á annan hátt.

Núgildandi jafnréttisáætlun Stjórnarráðsins kveður jafnframt á um að fræðsla um kynbundna og kynferðislega áreitni, og meðferð slíkra mála, verði þáttur í fræðslu jafnréttisfulltrúa ráðuneytanna. Haldin verða námskeið í janúar og febrúar fyrir það starfsfólk sem tekur á móti kvörtunum starfsfólks vegna kynbundinnar eða kynferðislegrar áreitni og í framhaldinu verður öllum starfsmönnum Stjórnarráðsins boðið uppá fræðslu um þetta málefni.

smari@bb.is

Mynd­ar­leg­ur borga­rís­jaki sést á gervi­hnatt­ar­mynd sem tek­in var norður af Vestfjörðum í gær­kvöldi. Á korti, sem Jarðvís­inda­stofn­un Há­skóla Íslands ger­ir eft­ir mynd frá Geim­vís­inda­stofn­un Evr­ópu, má sjá ís­jak­ann um­lukinn gisn­um haf­ís norður af Vest­fjörðum.

Sam­kvæmt því er fram kem­ur á Facebooksíðu Eld­fjalla­fræði- og nátt­úru­vár­hóps Há­skóla Íslands er borga­rís­jak­inn tal­inn vera 500 metr­ar að lengd og 200 metr­ar að breidd.

Mjög kaldur sjór hefur að undanförnu streymt austur á bóginn, frá Grænlandssyndi og í átt að Grímsey. Í kalda sjónum á Húnaflóa voru skýr merki um að aðstæður til nýmyndunar hafíss væru fyrir hendi, en sjór þarf að vera orðinn ansi kaldur til að geta frosið, því seltan lækkar frostmarkið. Ef sjór er fullsaltur, þarf hann að ná -1,8°C til að ná að frjósa, á meðan ferskt vatn frýs við 0°C.

smari@bb.is

Afgangur af rekstri samstæðu Strandabyggðar (A og B hluta) er áætlaður 26,9 milljónir króna á næsta ári. Fjárhagsáætlun var samþykkt í sveitarstjórn í síðustu viku að lokinni seinni umræðu. Áætlaðar fjárfestingar vegna framkvæmda árið 2018 hljóða upp á 64 milljónir króna. Haldið verður áfram í verkefninu Ísland ljóstengt og unnið að því að  ljósleiðaravæða í dreifbýli norðan Hólmavíkur og á Langadalsströnd yfir í Djúp. Áfram er unnið að undirbúningi vegna hitaveitu á Hólmavík. Sett verður niður nýtt stálþil í höfnina og unnið áfram að gatnaframkvæmdum innanbæjar á Hólmavík.  Byggja á nýja fjárrétt í Skeljavík, unnið verður áfram að viðhaldi á skólahúsnæði, endurbætur í íþróttamiðstöð og  framkvæmdir í félagsheimili auk þess sem fjármunir verða settir í hönnun á götum auk leikvalla og tjaldsvæðis. Áætlað er að fjármagna þessar framkvæmdir með 64 milljóna króna láni en takist sala eigna kemur það til lækkunar á lántöku.

smari@bb.is

Fyrir nokkrum mánuðum ákvað Bókasafnið á Ísafirði að taka upp margnota taupoka sem seldir yrðu á kostnaðarverði. Til að gera pokana vel úr garði gerða og smekklega ákvað starfsfólk Bókasafnsins að efna til samkeppni um slagorð og bárust margar góðar tillögur. Valið var ekki auðvelt, en að lokum var ákveðið að velja tvo texta:

Bókasafnið – þar sem lognið á lögheimili. – Höf. Matthildur Helgadóttir Jónudóttir.

Þessi poki hefur sögu að segja. – Höf. Kristján Freyr Halldórsson.

Höfundarnir fá að gjöf eintak af pokanum, en þeir verða annars seldir á 400 kr.

smari@bb.is

Ágætislíkur eru á hvítum jólum nokkuð víða á landinu. Veðurstofan spáir snjókomu á vesturhelmingi landsins á Þorláksmessu og á aðfangadag jóla ætti að snjóa á norðurhelmingnum. Þeir sem búa á Suðausturlandi ættu hins vegar að búa sig undir rauð jól. Ferðaveður verður gott á Þorláksmessu og ágætt á aðfangadag að minnsta kosti fyrri part dags.

Fram að helgi verður nokkuð rysjótt veður, í dag er nokkuð stíf suðvestanátt og svipuðu veðri er spáð á morgun. Veðrið gengur svo niður á fimmtudag og á föstudaginn, tveimur dögum fyrir jól, er von á enn einni lægðinni með allhvassru sauðaustanátt og rigningu. Það hlýnar vel upp fyrir frostmark. Eins og áður segir kólnar strax aftur á Þorláksmessu og von á jólasnjó á vestanverðu landinu og á aðfangadag snýst vindur í norðanátt. Það kólnar meira og frystir og þá er það norðurhelmingur landsins sem fær ofankomu.

smari@bb.is

Matvælastofnun varar við því að jólin geti endað í „niðurgangi og uppköstum sem hvorki er eiganda né dýri til ánægju,“ ákveði hundaeigendur að deila hátíðarsteikinni með hundinum. Á pistli á vefsíðu Matvælastofnun er sagt vera misskilin góðmennska að deila jólamatnum með hundinum, margir hundar eru viðkvæmir fyrir breytingum í mataræði og eru nokkrir hlutir sem sérlega ber að varast. Til dæmis inniheldur súkkulaði efnið theobromíð sem er eitrað hundum og hefur slæm áhrif á ketti. Mest er af theobrómíð í dökku súkkulaði. Theobrómíð hefur áhrif á hjarta, taugakerfi og nýru sem getur valdið alvarlegri eitrun, jafnvel dauða. Áhrifin byrja oft 4-24 klst eftir inntöku og geta verið uppköst, niðurgangur, óróleiki, ofvirkni, skjálfti, óstöðugleiki og krampi. Ekkert mótefni er til. Því þarf að fara með dýrið til dýralæknis sem fyrst.

„Ef um 30 kg hund er að ræða gæti verið um lífshættulega eitrun ef hann étur yfir 1 kg af mjólkursúkkulaði, ½ kg af dökku súkkulaði og 170 g af suðusúkkulaði. Eituráhrif myndu koma fram við lægri skamt td líklegt að uppköst og niðurgangur sæist við inntöku af 200 g af mjólkursúkkulaði, möguleg áhrif á hjartað við 500 g og trúlega skjálftar og krampar við 750 g,“ segir í pistli Matvælastofnunar.

Stofnunin varar jafnframt við því að hundar komist í lauk, hvítlauk, graslauk, rúsínur, ber, avocado, bein, heslihnetur, gerdeig og gervisætuefnið Xylitol.

smari@bb.is

Gert er ráð fyrir 16 milljóna kr. afgangi í fjárhagsáætlun Reykhólahrepps sem var samþykkt eftir síðari umræðu í sveitarstjórn fyrir helgi. Fjárhagsáætlun ársins 2018 gerir ráð fyrir samanlögðum tekjum A og B hluta upp 558 milljónir króna og þar af eru útsvarstekjur 127 milljónir krónur og tekjur frá Jöfnunarsjóði 176 milljónir krónur.  Samanlögð útgjöld A og B hluta eru 543 milljónir króna og þar vega laun þyngst, eða 352 milljónir króna.

Sveitarstjórn samþykkti að auka framlag til gatnagerðar í fjárhagsáætlun næsta árs um 10 milljónir króna sem fjármagnast með lántöku.

smari@bb.is

Búast má við allhvassri suðvestanátt víða um land í dag og á morgun með skúrum í fyrstu en síðar slydduél eða él á suður- og vesturhelmingi landsins en léttskýjað á Norðausturlandi. Slæmt ferðaveður verður síðdegis í dag og á morgun í kröftugustu éljunum þar sem búast má við lélegu skyggni að því er segir í tilkynningu frá Veðurstofunni.

Hiti verður í kringum frostmark en kólnar heldur norðantil á morgun. Á föstudag verður sunnanátt og talsverð rigning sunnanlands með hlýindum en á Þorláksmessu snýst í norðaustanátt og kónar aftur með éljum norðan- og austanlands en úrkomulítið syðra.

Það er hálka, hálkublettir eða snjóþekja á Vestfjörðum og eitthvað um éljagang. Flughálka á Bjarnarfjarðarhálsi. Ófært er yfir Hrafnseyrar- og Dynjandisheiði.

smari@bb.is

Velferðarsvið Ísafjarðarbæjar hefur fengið staðfestingu velferðarráðuneytisins um að bænum bjóðist að taka á móti flóttamönnum frá Sýrlandi. Bæjarráð Ísafjarðarbæjar samþykkti í gær tillögu Gísla Halldórs Halldórssonar bæjarstjóra um að bærinn bjóðist til að taka má móti fólkinu sem verða eitthvað á þriðja tug talsins. Móttaka flóttafólksins verði unnin í samstarfi sveitarfélaganna á norðanverðum Vestfjörðum eins og kostur er.

Koma flóttafólksins gæti orðið í lok janúar eða í febrúar 2018, samkvæmt upplýsingum frá ráðuneytinu. Velferðarsvið Ísafjarðarbæjar hefur gert ráðuneytinu ljóst að bærinn ráði vel við þetta verkefni, enda liggur fyrir að hægt verður að finna húsnæði.

smari@bb.is