Þyrlusveit Landhelgisgæslunnar auk sjóbjörgunarsveita Slysavarnafélagsins Landsbjargar á Patreksfirði, Grundarfirði, Rifi og Stykkishólmi voru kallaðar út á öðrum tímanum í nótt í kjölfar þess að staðsetningarmerki fiskibáts bárust ekki lengur stjórnstöð Landhelgisgæslunnar í Skógarhlíð. Að auki svaraði eigandi bátsins ekki köllum Landhelgisgæslunnar í gegnum talstöð og ekki náðist í viðkomandi í síma.

Varðstjórar í stjórnstöð Landhelgisgæslunnar óskuðu eftir því að bátar í grenndinni héldu á vettvang til að svipast um eftir bátnum sem saknað var auk þess sem sjófarendum á norðanverðum Breiðafirði var tilkynnt um leitina á rás 16.

Síðasta þekkta staðsetning bátsins var um 5,6 sjómílur suðaustur af Brjánslæk. Fyrsti bátur sem kom á leitarsvæðið sá ekki til fiskibátsins en skyggni til leitar var slæmt á Breiðafirði sökum þoku.

Landhelgisgæslan óskaði einnig eftir því við lögregluna á Vestfjörðum að kanna hvort báturinn kynni að vera kominn til hafnar þrátt fyrir að slíkar upplýsingar hefðu ekki borist stjórnstöð Landhelgisgæslunnar.

Laust fyrir klukkan þrjú kom í ljós að báturinn sem leitað var að var kominn til hafnar á Brjánslæk og var leit þá afturkölluð.

Landhelgisgæslan áréttar mikilvægi þess að sjófarendur tilkynni sig úr höfn við brottför, hlusti vel á rás 16 og fari vel yfir virkni þess öryggisbúnaðar sem um borð er. Einnig er mjög mikilvægt að sjómenn tilkynni um breytt símanúmer um borð.

Í gærkvöldi fékk Björgunarbátasjóður Vestfjarða styrk frá Lionsklúbbi Ísafjarðar til kaupa á nýju björgunarskipi, Gísla Jóns sem væntanlegur er í nóvember næstkomandi.

Styrkurinn nemur 500 þúsund krónum og mun nýtast vel við að efla enn frekar viðbragð á sjó við Djúp segir í tilkynningu frá björgunarbátasjóðnum.

Af því tilefni var Lionsfélögum boðið til kaffisamsætis í Guðmundarbúð þar sem fulltrúar Björgunarbátasjóðsins tóku við styrknum, einnig fengu Lionsfélagar að sjá aðstöðu Björgunarfélags Ísafjarðar í Guðmundarbúð.