Jólakort Verkalýðsfélags Vestfirðinga með mynd af elsta Vestfirðingnum

Karl Sigurðsson er elsti íbúi Vestfjarða og elsti karlmaður á Íslandi

Fyrir hver jól sendir Sjúkrasjóður Verkalýðsfélags Vestfirðinga félagsfólki sem hefur lokið starfsævinni Jólaglaðning ásamt fallegu korti frá félagssvæðinu.

Á árinu 2018 varð sú breyting á myndefninu að sjóðsstjórnin óskaði eftir því við elsta félagsfólk Verk Vest að að sitja fyrir á myndum sem prýða Jólakort félagsins.

Lögð hefur verið áhersla á að finna elstu hjón eða sambúðarfólk sem bæði eru félagsfólk eða eins og í ár elsta félagsmanninn. Okkar félagsfólk hefur ávalt brugðist vel við og afraksturinn verður að persónulegri og fallegri Jólakveðju til félagsmanna. Í samstarfi með okkur hefur verið myndasmiðurinn Ágúst Atlason, eða Gústi ljósmyndari, sem hefur fundið viðeigandi stund og stað hverju sinni með félagsfólki Verk Vest. 

Í ár prýðir elsti félagsmaður Verk Vest, Karl Sigurðsson, Jólakortið. En jafnframt því að vera elsti félagsmaður Verk Vest er Kalli elsti íbúi Vestfjarða og elsti karlmaður á Íslandi en hann varð 104 ára 14. maí 2022. Karl var skipstjóri í Hnífsdal, lengst á Mími og stundaði sjómennsku fram undir fimmtugt. Síðan var Kalli vélstjóri í Hraðfrystihúsinu í Hnífsdal til 78 ára aldurs. 

DEILA