Lögreglan á Vestfjörðum hefur undanfarin ár verið með góðan liðsmann/hund í fíkniefnaleitarhundinum Tind.
Hann hefur staðið sig með prýði en er komin á efri ár og mun væntanlega ljúka starfsskyldum sínum sem slíkur fljótlega á næsta ári.
Við honum tekur ungur og sprækur fíkniefnaleitarhundur sem ber heitið Buster.
Buster er fullþjálfaður fíkniefnaleitarhundur og var afhentur lögreglunni á Vestfjörðum fyrr í þessum mánuði. Það var Steinar Gunnarsson, lögreglufulltrúi hjá lögreglunni á Norðurlandi vestra sem afhenti hundinn eftir mikla þjálfunarvinnu.
Buster er í umsjá lögreglukonunnar Marín Elvarsdóttur sem er settur varðstjóri í lögreglunni á Vestfjörðum.
