Umhverfis-, orku- og loftslagsráðherra hefur ákveðið að að auglýstir verði styrkir til orkuskipta að upphæð 900 milljónir af þeim fjárveitingum sem veittar eru til loftslagsmála í ár.
Um er að ræða eina hæstu upphæð sem sjóðurinn hefur úthlutað um árabil.
Styrkirnir eru liður í aðgerðum stjórnvalda í loftslagsmálum og orkuskiptum og eru styrkflokkar í samræmi við stefnu stjórnvalda um að styðja við orkuskipti á landsvísu. Áhersla er lögð á vistvæna orkunýtingu, sem og að styðja við orkuskipti í samgöngum um land allt.
Áframhaldandi stuðningur er við uppbyggingu hleðslunets fyrir rafbíla.
Styrkirnir geta að hámarki numið 33% af áætluðum stofnkostnaði.
Styrkir verða veittir til eftirfarandi verkefna:
- Bætt orkunýting, t.d. búnaður sem minnkar raforkunotkun til beinnar upphitunar í rafkyntum varmaveitum og/eða dregur úr olíunotkun.
- Verkefni sem minnka olíunotkun í iðnaði, t.d. búnaður sem nýtir vistvæna orku í stað olíu.
- Líf- eða rafeldsneytisframleiðsla og orkugeymslur.
- Veittir verða styrkir sem ætlaðir eru fyrir uppsetningu hleðslu- eða áfyllingastöðva til þéttingar nets hleðslustöðva við vegakerfi, fyrir vistvæn ökutæki við gististaði, frístundasvæði, verslanir og fjölsótta ferðamannastaði.
- Aðgerðir sem nýta vistvæna orku í haftengdri starfsemi og í siglingu til og frá höfn.
