Í síðustu viku áttu áttu formaður og framkvæmdastjóri Landssambands smábátaeigenda fund með Svandísi Svavarsdóttur sjávarútvegs- og landbúnaðarráðherra en þann 21. desember sl. ákvað ráðherra með undirritun reglugerðar að skerða þorskveiðiheimildir sem ætlaðar eru til strandveiða næsta sumar og almenns byggðakvóta.
Á fundinum mótmælti LS ákvörðuninni harðlega. Sagði hana ganga þvert á þau markmið að tryggja 48 daga til strandveiða. LS lagði áherslu á að strandveiðar væru þær veiðar sem yllu minnstu raski í hafrýminu og minnstu kolefnissótspori. Auk þess hefðu þær reynst gríðarlega vel fyrir hinar dreifðu byggðir.
Í ljósi þessa treystir LS á að ákvörðunin verði endurskoðuð, enda hér mikið alvörumál sem snertir um 700 útgerðir auk flest öll byggðarlög landsins.
Í frétt Morgunblaðsins í dag kemur fram að ráðherra ætlar ekki að verða við þessum óskum. Svandís svarar skýrt spurningum um hvort strandveiðikvótinn verði aukinn. „Skerðingin byggir á vísindalegri ráðgjöf Hafrannsóknarstofnunar en vísindaleg ráðgjöf um hámarksafla er hornsteinn íslenska fiskveiðistjórnunarkerfisins,“ segir í svari Svandísar sem kveðst ekki hafa átt annarra kosta völ. „Að sinni tel ég ekki ástæðu til að endurskoða þann afla sem er áætlaður strandveiðum og ganga þar með gegn vísindalegri ráðgjöf.“
