Píratar hafna 50 prósenta formannsálagi á þingfararkaup

Halldóra Mogensen hefur verið endurkjörin þingflokksformaður Pírata. Kjör hennar fór fram á þingflokksfundi Pírata í dag, þar sem Björn Leví Gunnarsson hlaut jafnframt embætti formanns flokksins. Á fundinum var Þórhildur Sunna Ævarsdóttir einnig endurkjörin varaþingflokksformaður og Gísli Rafn Ólafsson útnefndur næsti ritari þingflokksins.

Við upphaf hvers löggjafarþings hefur þingflokkur Pírata jafnframt valið nýjan formann Pírata með hlutkesti. Það var framkvæmt á fyrrnefndum þingflokksfundi og féll embættið í skaut Björns Levís Gunnarssonar.

Formannsembættinu fylgja engar formlegar skyldur eða valdheimildir. Björn Leví mun þannig, rétt eins og fyrri formenn Pírata, hafna 50 prósenta formannsálagi á þingfararkaup. Þingflokkur Pírata stendur fyrir formannsvalinu til að uppfylla formkröfur Alþingis og þannig tryggja aðgang að sömu aðstoð og aðrir þingflokkar njóta.

DEILA