Á Alþingi hefur Albertína Friðbjörg Elíasdóttir þingmaður Samfylkingarinnar lagt fyrir mennta- og menningarmálaráðherra tvær spurningar varðandi prófessorsstöðu tengda nafni Jóns Sigurðssonar sem stofnað var til árið 2011 þegar 200 ár voru liðin frá fæðingu Jóns.
Spurningarnar eru eftirfarandi:
1. Hefur verið metið hvaða árangri prófessorsstaða tengd nafni Jóns Sigurðssonar forseta hefur skilað miðað við þau markmið sem sett voru í þingsályktun nr. 44/139?
2. Hvenær var prófessorsstaðan auglýst síðast? Hvenær verður hún auglýst næst?
Eftirfarandi var samþykkt á Alþingi 15. júní 2011.
Þingsályktun
um prófessorsstöðu tengda nafni Jóns Sigurðssonar forseta.
Alþingi ályktar – í tilefni af 200 ára fæðingarafmæli Jóns Sigurðssonar forseta 17. júní 2011 – að stofnuð verði prófessorsstaða tengd nafni hans.
Prófessorsstaðan verði við Háskóla Íslands en starfsskyldur þess sem henni gegnir verði m.a. við Rannsóknasetur Háskóla Íslands á Vestfjörðum og í samstarfi við Háskólasetur Vestfjarða.
Staðan verði auglýst og skipað í hana á fimm ára fresti eftir almennum reglum um prófessora. Heimilt verði að endurnýja skipunartímann einu sinni.
Prófessorinn hafi rannsóknar- og kennsluskyldu í sínu fagi. Eitt lykilverkefna verði að halda árlega ráðstefnur og námskeið í sumarháskóla á Hrafnseyri með innlendum og erlendum kennurum og fyrirlesurum.
Við skipun í prófessorsembættið verði höfð hliðsjón af því hvernig áætlun umsækjenda um rannsóknastarf og kennslu tengist lífi, starfi og arfleifð Jóns Sigurðssonar og efli þekkingu á sjálfstæðisbaráttu þjóðarinnar.
Alþingi ályktar að fela ríkisstjórninni að undirbúa málið þannig að prófessorinn geti tekið til starfa frá og með næstu áramótum.
