Meistaraflokkur kvenna hjá Kkd. Vestra mun leika í 1. deild Íslandsmótsins í vetur eftir fimm ára hlé.
Í liðinu verður hin bandaríska Olivia Crawford sem er 23 ára leikstjórnandi og lék með Seattle University á síðustu leiktíð.
Hún byrjar því atvinnumannaferil sinn á Ísafirði.
Olivia er fyrsti erlendi leikmaðurinn í kvennakörfunni á Ísafirði í fimm ár en síðast lék Labrenthia Murdoch með KFÍ tímabilið 2014-2015.
Liðið náði þá þriðja sæti 1. deildarinnar.
Meistaraflokkurinn var endurvakinn á ný nú snemmsumars en uppistaðan í honum verða 15-18 ára leikmenn Vestra sem hafa spilað upp alla yngri flokka deildarinnar.
Pétur Már Sigurðsson er þjálfari meistaraflokks kvenna en hann þjálfar jafnframt meistaraflokk karla.
