Aflaverðmæti árið 2019 jókst um 13,4% þrátt fyrir minni afla

Heildarafli íslenskra skipa árið 2019 var 1.047.568 tonn sem er um 17% minni afli en landað var árið 2018.
Samdráttur í aflamagni skýrist að mestu af minni uppsjávarafla.
Aflaverðmæti fyrstu sölu jókst hins vegar um 13,4% á milli ára og nam 145 milljörðum króna árið 2019.

Alls veiddust rúmlega 480 þúsund tonn af botnfiski sem er álíka mikið og árið 2018.
Aflaverðmæti botnfiskaflans var 112,3 milljarðar króna sem er 24% aukning frá árinu 2018.

Mest veiddist af þorski árið 2019 og var hann sem fyrr verðmætasta tegundin. Þorskaflinn nam tæplega 273 þúsund tonnum og nam aflaverðmæti fyrstu sölu tæpum 70 milljörðum króna.

Afli uppsjávartegunda var ríflega 534 þúsund tonn árið 2019 sem er 27,7% minni afli en árið 2018.
Munar þar mest um að loðnu var ekki landað á árinu sem hefur ekki gerst síðan skráðar loðnuveiðar hófust árið 1962. Loðnuaflinn var 178 þúsund tonn árið 2018 og nam aflaverðmætið ríflega 4,7 milljörðum.

Af uppsjávarafla veiddist mest af kolmunna, rúm 268 þúsund tonn. Aflaverðmæti uppsjávaraflans samanstóð af makríl, að verðmæti tæplega 8,5 milljarðar króna, kolmunna 7,2 milljarðar og síld 5,9 milljarðar.

Af flatfiski veiddust rúmlega 22 þúsund tonn árið 2019 sem er 18,1% minna en á fyrra ári. Aflaverðmæti flatfiskafurða nam 9,3 milljörðum sem er 8,3% lægra en árið 2018.

Löndun á skelfisk og krabbadýrum var rúmlega 10 þúsund tonn samanborið við 12,5 þúsund tonn árið 2018. Verðmæti skel- og krabbadýra nam tæplega 1,9 milljörðum sem er 28,5% minna en árið 2018.

DEILA