BB fékk tölvupóst þar sem þess var óskað að því væri komið á framfæri að farmur hefði verið fastur þó hluti af honum hefði fokið en frá þessu var sagt í frétt þess efnis að akandi vegfarendur í Ísafjarðardjúpi hefðu fengið járnplötu inn um framrúðu hjá sér. Í athugasemdinni sem BB barst þá segir:
„Í fréttinni er það fullyrt að dráttarvélin hafi ekki verið vel fest á það farartæki sem flutti hana og það hafi orðið til þess að þakið af henni fauk af og það hafnað á framrúðu bifreiðar sem kom akandi úr gagnstæðri átt. Er þessu haldið fram án þess að nokkur gögn í málinu liggi fyrir um að vélin hafi ekki verið vel fest á það farartæki sem flutti hana. Hið rétta í málinu er það að dráttarvélin var kyrfilega fest niður með þar til gerðum búnaði sem ætlaður er til flutninga á tækjum sem þessum. Það að þak dráttarvélarinnar hafi fokið af henni í miklum vindi hefur ekkert með festingar á vélinni að gera. Meðfylgjandi eru myndir af því með hvaða hætti dráttarvélin var fest á pall bílsins sem flutti hana.“ Meðfylgjandi myndir eru frá Erlu Rut Sigurðardóttur.
Alvarleiki málsins er þó enn mikill þó meginfarmurinn hafi verið fastur, þar sem hluti af honum fauk og olli hættu fyrir aðra í umferðinni.
Sæbjörg
bb@bb.is
