Þriðjudagur 6. maí 2025
Heim Blogg Síða 2

Málþing um snjóflóð: alvarlegar athugasemdir gerðar við dvöl í eldri byggð í Súðavík

Hlynur Hafberg Snorrason og Rögnvaldur Ólafsson á málþinginu í gær. Mynd: Kristinn H. Gunnarsson.

Fram komu á fyrri degi málþings um snjóflóð og samfélög, sem haldin er á Ísafirði, alvarlegar athugasemdir við dvöl fólks í íbúðum í eldri byggðinni í Súðavík í vetur.

Eftir snjóflóðið 1995 var byggðin flutt innar í fjörðinn, að Langeyri. Þau hús, sem eftir stóðu og voru íbúðarhæf, voru keypt upp og síðar seld með þeirri kvöð að dvöl fólks í þeim væri óheimil frá 1. október til 30. apríl ár hvert. Fyrir páska kom fram að lögreglan á Vestfjörðum hafði gert athugasemdir við dvöl fólks í nokkrum íbúðum, en gat ekkert aðhafst ef viðkomandi vildi ekki rýma húsið þar sem ekkert lagaákvæði er til staðar sem bannar dvöl í íbúðunum, einungis ákvæði í afsali. Þvi eru engin úrræði til að grípa til og engin refsiákvæði sem hægt er að beita til að fá fólk til að fara úr íbúðinni.

Lögreglan hefur því engin ráð nema lýst hafi verið yfir hættuástandi vegna snjóflóðahættu, en þá virkjast heimildir til rýmingar.

Á ráðstefnunni fóru Rögnvaldur Ólafsson, yfirlögregluþjónn hjá Fjarskiptamiðstöð Ríkislögreglustjóra og Hlynur Hafberg Snorrason, yfirlögregluþjónn hjá Lögreglunni á Vestfjörðum yfir aðkomu lögreglunnar að snjóflóðunum í Súðavík og á Flateyri og spurðu hvað við hefðum lært. Þeir voru þá báðir starfandi lögreglumenn á Vestfjörðum og tóku virkan þátt í björgunaraðgerðum. Báðir gagnrýndu þeir dvöl fólks í íbúðunum í Súðavík á þeim tíma sem bannað er að vera í þeim. Hlynur nefndi sérstaklega að hann vildi að húsin yrðu keypt aftur til ríkisins og rifin en annars yrði bætt í lög bann við dvöl og refsiúrræði sem hægt yrði að grípa til.

Halldór Halldórsson, fyrrv. bæjarstjóri í Ísafjarðarbæ í 12 ár og Bragi Þór Thoroddsen, sveitarstjóri í Súðavík tóku báðir í svipaðan streng í umræðum að loknu erindi Rögnvaldar og Hlyns.

Fram kom hjá fulltrúa umhverfisráðuneytisins, sem fer með ofanflóðamálefni, að þessi staða væri þegar til skoðunar í ráðuneytinu og væri verið að skoða hvernig best væri að bregðast við. Þar kæmu lagabreytingar til greina.

Auglýsing

Salsanámskeið á Ísafirði

Á þessu salsanámskeiði gefst þátttakendum tækifæri til að kynnast grunnatriðum salsa.

Námskeiðið er ætlað öllum þeim sem vilja efla sjálfstraust sitt á dansgólfinu og öðlast skilning á takti, líkamsbeitingu og tjáningu í gegnum latneska tónlist.

Á námskeiðinu verða kennd grunnspor og hreyfingar í salsa með áherslu á einstaklingsvinnu fremur en paradans.  Námskeiðið hentar bæði þeim sem eru að stíga sín fyrstu spor og þeim sem hafa einhverja reynslu og vilja endurnýja dansgleðina.

Kennari á námskeiðinu er Alejandra De Avila en hún hefur bakgrunn í tónlist og leikhúsi og hún er menntaður kennari í tónlistar- og hreyfifræðslu. Hún hefur starfað sem kennari við Listaháskóla Íslands, unnið með og sett upp sýningar bæði með atvinnumönnum og áhugafólki og verið með námskeið og fræðslu víða um heim. Síðustu  ár hefur hún starfað sem kennari við Tónlistarskóla Vesturbyggðar. 

Ekki þarf að koma með dansfélaga og engin fyrri reynsla er nauðsynleg. Þátttakendum er ráðlagt að koma með þægileg íþróttaskó.

Auglýsing

Sniglarnir – Bifhjólasamtök lýðveldisins söfn­uðu fyrir vega­gerð

Söfnunarátak Sniglanna bar yfirheitið „Veginn heilan heim“ og fór af stað í samstarfi við Endurvinnsluna í desember í fyrra.

Tilgangurinn var að greiða niður 150 milljarða króna viðhaldsskuld á samgöngukerfinu.

Meginmarkmið átaksins var að vekja athygli á bágri stöðu á viðhaldi vega og þörf fyrir meira fé til framkvæmda.

Þann 1. maí var komið að því að afhenda afrakstur söfnunarinnar. Stjórn Snigla ásamt fríðum hópi mótorhjólafólks mætti fyrir framan Alþingi til að afhenda Arndísi Ósk Ólafsdóttur Arnalds, framkvæmdastjóra mannvirkjasviðs Vegagerðarinnar, ágóða söfnunarinnar.

Svo vel vildi til að Eyjólfur Ármannsson, innviðaráðherra, var á gangi um Austurvöll og slóst í hópinn enda málið honum sannarlega skylt. Gott samtal varð milli þessara aðila sem sammæltust um að berjast áfram fyrir bættum samgöngum.

Söfnunin gekk framar vonum en í heild söfnuðust 400 þúsund krónur sem samsvarar því að leggja 10 metra af malbiki, eða 50 metra af klæðingu. Það munar sannarlega um minna.

Auglýsing

Öruggari Vestfirðir

Þann 7. maí næstkomandi frá kl.10-15 verður annar samráðsfundur um „Öruggari Vestfirði“ haldin í Sauðfjársetrinu á Hólmavík.

Öruggari Vestfirðir er svæðisbundinn samráðsvettvangur þar sem unnið er með markvissum hætti að auknu öryggi íbúa með fræðslu um ofbeldi og skaðsemi þess auk varna gegn afbrotum á Vestfjörðum. Á samráðsfundum koma allir helstu hagaðilar á Vestfjörðum að undirbúningi eða samtali með einum eða öðrum hætti.

Á samráðsfundinum verður sérstök áhersla á forvarnir meðal barna og ungmenna. Því eru öll þau sem vinna með málefni barna og fjölskyldna sérstaklega velkomin á fundinn.

Auglýsing

Samningum Byggðastofnunar lokið nema á Flateyri

Í frétt frá Byggðastofnun kemur fram að á síðasta ári hafi samningar Byggðastofnunar um aflamark hennar við útgerðir og vinnsluaðila um allt land runnið sitt skeið á enda. 

Vinna við nýja samninga hefur því verið fyrirferðamikil síðustu misserin en gerðir hafa nú verið samningar í öllum þátttökubyggðalögunum, utan við Flateyri en sá samningur mun væntanlega líta dagsins ljós á næstu vikum.

Alltaf er mikil umræða um þetta verkefni Byggðastofnunar og skiljanlegt að menn hafi á því skiptar skoðanir þar sem verið er að úthluta takmörkuðum gæðum án endurgjalds. 

Því er það mikið metnaðarmál starfsmanna stofnunarinnar í þessu verkefni sem og öðrum að vanda vel til verka og fylgja skýrum réttarheimildum að því er segir í frétt Byggðastofnunar. 

Nýir samningar eru í flestum tilfellum til sex ára og með það að markmiði að auka fyrirsjáanleika í rekstri samningsaðila og ýta þannig undir byggðafestu í viðkomandi byggðum. 

Samkvæmt skilagreinum samningsaðila viðhéldu eða sköpuðu samningarnir 416 ársverkum/störfum í mörgum af viðkvæmustu byggðalögum á Íslandi á seinasta fiskveiðiári.  Störf sem mörg hver hefðu ella aflagst með viðeigandi neikvæðum byggðaáhrifum á þessum stöðum.  

Auglýsing

Ísafjarðarbær fær 9 m.kr. styrk vegna netöryggis

Sjóður á vegum Rannís, Eyvör, hefur samþykkt að veita Ísafjarðarbæ 9 m.kr. styrk til að vinna að netöryggi. Verkefnið felur í sér ítarlega úttekt á netkerfum sveitarfélagsins, með áherslu á
veikleikaskimun, öryggisgreiningu og fræðslu starfsmanna um netöryggi. Markmið
verkefnisins er að greina hugsanlegar öryggisógnir, efla innri þekkingu starfsmanna og auka
vitund um mikilvægi netöryggis innan sveitarfélagsins. Niðurstöður verkefnisins munu leggja
grunn að bættri netöryggismenningu og öruggari stafrænum innviðum segir í minnisblaði verkefnisstjóra tæknilausna og innkaupa til bæjarráðs.

Áhrif verkefnisins á sveitarfélagið eru m.a. aukið rekstraröryggi og betri vernd persónuupplýsinga, ásamt betri undirbúningi gegn netárásum og gagnalekum.

Heildarkostnaður verkefnisins er áætlaður 10.800.000 kr., þar af nemur styrkur Eyvarar NCCIS 9.000.000 kr. eða 83,3% af heildarkostnaði. Mótframlag Ísafjarðarbæjar nemur að hámarki 1.800.000 kr., eða 16,7% af heildarkostnaði. Mótframlagið er fyrst og fremst vinnuframlag starfsfólks sveitarfélagsins. Komi til þess að vinnuframlag sveitarfélagsins nái ekki að uppfylla þetta framlag að fullu gæti þurft að leggja fram hluta þess í formi fjármagns, þó aldrei hærri upphæð en 1.800.000 kr.

Bæjarráð samþykkti í síðustu viku að leggja fram mótframlag sveitarfélagsins.

Auglýsing

Skotís: 17 verðlaun á Íslandsmeistaramóti

Sveit Skotís í liðakeppninni í 50 m liggjandi riffil sem vann gullið. Mynd: Skotís.

Um helgina fór fram Íslandsmeistaramót í skotíþróttum á vegum Skotíþróttafélags Íslands. Keppt var í Digranesi í Kópavogi. Skotíþróttafélag Ísafjarðar sendi 7 keppendur til leiks og fengu þeir 8 Íslandsmeistarartitla og samtals 17 verðlaun.

Leifur Bremnes vann gull í 50 metra þrístöðuriffli og Karen Rós Valsdóttir varð hlutskörpust í stúlknaflokki í 50 metra liggjandi. Í liðakeppninni varð sveit Skotís Íslandsmeistari.

Auglýsing

Súðavík: vill ræða við sveitarstjórn Strandabyggðar

Sveitarstjórn Súðavíkurhrepps tók fyrir erindi frá Strandabyggð þar sem óskað er eftir óformlegum viðræðum um sameiningu sveitarfélaganna. Sveitarstjóra var falið að finna tíma í maí fyrir fund með sveitarstjórn Strandabyggðar. Ekkert er bókað um afstöðu til sameiningar sveitarfélaganna.

Þá tók sveitarstjórn Árneshrepps fyrir sams konar erindi fyrir páskana frá Strandabyggð. Um það er einungis bókað að umræður fóru fram um sameiningarmál á fundinum.

Auglýsing

Knattspyrna: Vestri aftur á toppinn

Gunnar Jónas Hauksson skorar seinna mark Vestra í Eyjum í gær.

Enn heldur knattspyrnulið Vestra í Bestu deild karla að koma sparkspekingum á óvart. Í gær sótti Vestri heim ÍBV í Vestmannaeyjum. Eyjamenn hafa einnig komið á óvart í byrjun móts og voru með 7 stig eftir fyrstu þrjár umferðirna,rétt eins og Vestri.

Í leiknum voru það Vestfirðingarnir sem höfðu betur, spiluðu sterka og skipulagða vörn og sóttu hratt fram á við þegar færi gafst. Vladimir Tufegdiz skoraði fyrra markið rétt fyrir lok fyrri hálfleiks og Gunnar Jónas Hauksson skoraði síðara markið skömmu fyrir leikslok eftir snögga sókn.

Vestri var í 3. sæti deildarinnar eftir fyrstu þrjár umferðirnar og sigurinn í gær gerði það að verkum að liðið tyllti sér á toppinn. Fjórðu umferð lýkur í kvöld en Vestri hefur með sigrinum tryggt sér að verða ekki neðar en í 3. sæti. Breiðablik og Víkingur geta komist upp fyrir Vestra en verða þá að vinna sína leiki í kvöld.

Næsti leikur verður á Ísafirði á laugardaginn kemur. Leikið verður á Kerecis vellinum á Torfnesi og það verður Afturelding úr Mosfellsbænum sem kemur í heimsókn.

Auglýsing

Ísafjörður: Styrkja kaup á nýju björgunarskipi um 1 m.kr.

Frá styrkafhendingunni sem fór fram í Kiwanishúsinu Sigurðarbúð. F.v. Páll Brynjar Pálsson, Ragnar Kristinsson, Eggert Stefánsson,Kolbeinn Guðjónsson og Marinó Arnórsson. Mynd: Kristinn H. Gunnarsson.

Á laugardaginn var tilkynnt um 1 m.kr. styrk til kaupa á nýju björgunarskipi fyrir Björgunarfélag Ísafjarðar. Það eru Kiwanisklúbburinn Básar, útgerðarfélagið Öngull og starfsmannafélag áhaldahússins sem leggja fram fé til kaupanna. Kiwanisblúbburinn gefur 300 þúsund kr., starfsmannafélagið 200 þúsund krónur og útgerðarfélagið Öngull 500 þúsund krónur.

Það er Landsbjörg ásamt ríkissjóði sem annast smíði nýrra björgunarskipa og fara tvö þeirra til Vestfjarða. Annað til Patreksfjarðar og hitt til Ísafjarðar.

Að sögn Ragnars Kristinssonar, gjaldkera björgunarbátasjóðs Ísafjarðar kemur nýja skipið í október. Kostnaður við hvert skip er um 340 m.kr. Ríkissjóður greiðir helming og Landsbjörg fjármagnar fjórðung. Heimamenn á hverjum stað sjá svo um síðasta fjórðunginn, sem er um 85 m.kr.

Ragnar sagði fjársöfnun björgunarbátasjóðsins færi nú af stað fyrir alvöru og hvatti hann alla þá sem vildu styrkja kaupin að hefjast handa, svo sem fyrirtæki og starfsmannafélög.

Ragnar sagði að settur verður sérstakur gálgi á skipið sem kemur til Ísafjarðar svo það geti verið með gúmbjörgunarbát tilbúinn um borð og því verði kostnaður heimamanna um 90 m.kr. Það er fjárhæðin sem stefnt er að því að safna fyrir. Þetta sagði Ragnar nauðsynlegt vegna þess hve oft verða útköll yfir í Jökulfirði og stundum koma önnur útköll þegar báturinn er fyrir í útkalli. Þá kemur sér vel að hafa búnaðinn svo ekki þurfi fyrst að fara til Ísafjarðar og sækja gúmbátinn.

Skipið er smíðað í Finnlandi. Það er 17 metra langt af gerðinni Kewatec Serecraft SAR 17.

Útlitsmynd af nýja björgunarbátnum.

Auglýsing
123...2.417Síða 2 af 2.417

Nýjustu fréttir

Allt um Vestfirði og Vestfirðinga. Hafið samband: bb(hja)bb.is

Um Bæjarins besta

Fréttaflokkar

Aðsendar greinarFréttirÍþróttirLífiðMinningargreinarRitstjórnargreinar

Nýlegt á BB.is

© Steig ehf. Allur réttur áskilinn.