Breski vefurinn SalmonBuisness.com greindi frá því á þriðjudaginn að ný rannsókn í Bresku Kólómbíu á Kyrrahagsströnd Kanada hefði sýnt að engin mælanleg áhrif væru af laxeldi í sjókvíum á lúsagengd á villtum laxi. Er það í andstöðu við það sem lengi hefur verið haldið fram að banna við sjókvíaeldi myndi draga úr lúsum á villtum laxi og vera til hagsbóta fyrir hann.

Rannsóknin leiddi í ljós að fjöldi lúsa á villtum laxi hefði haldist mjög svipað eftir að laxeldiskvíum á tilteknu svæði sem var til rannsóknar var lokað. Viðbótarrannsóknar Salmon Coast Research Station sem birtar voru í vikunni hefðu sýnt óverulegar breytingar á lúsaálagi.

Þessar rannsóknir eru í takt við niðurstöður rannsókna í Noregi, sem greint var frá fyrr á þessu ári í Reviews in Aquaculture. Þar voru niðurstöðurnar að lúsaálag í eldiskvíum hefðu ekki mælanleg áhrif á villta laxastofna.

Haft er eftir Simon Jones sem er vísindamaður hjá Fisheries and Oceans Canada (DFO), opinberri stofnun í Kanada sem fer með málefni hafs og vatns að þetta væri mikilvæg niðurstaða sem þýddi að afla þyrfti frekari skýringa á þeim atriðum sem hafa áhrif á villta laxastofna.

Samtök laxeldisbænda í Bresku Kólombíu í Kanada hafa af þessu tilefni áréttað nauðsyn þess að nýta vísindin til þess að þróa atvinnugreinina.

Tekjur hafnasjóðs munu fara yfir milljarð króna á næsta ári samkvæmt tillögu að fjárhagsáætlun Ísafjarðarbæjar fyrir 2025 sem er til afgreiðslu á bæjarstjórnarfundi í dag.

Gjöld hafnasjóðs eru liðlega helmingur teknanna afgangur því nálægt hálfum milljarði króna. Mikil breyting hefur orðið á afkomu hafnasjóðsins frá covidárinu 2020 þegar gjöldin voru hærri en tekjurnar. Tekjurnar hafa ríflega fimmfaldast á þessum tíma og eru áætlaðar á þessu ári nálægt milljarði króna.

670 m.kr. framkvæmdir

Framkvæmdageta hafnasjóðs er mikil veegna hinnar góðu afkomu. Samkvæmt tillögunni að fjárhagsáætlun er áætlað að framkvæma fyrir 670 m.kr. Þar af eru 458 m.kr. við framkvæmdir á Ísafirði. Meðal framkvæmda á næsta ári eru gatnagerð við Hrafnatanga þar sem gatan verður flutnings- og
aðkomuleið að Sundabakka þegar girðing er lokuð vegna hafnverndar. Mikil þörf er á að lengja viðlegukanta fyrir ferðaþjónustubáta í Sundahöfn, þar sem þeim hefur fjölgað og þeir stækkað undanfarin
ár. Stefnt er að því að fjölga viðleguplássum fyrir skútur og minni báta á Ísafirði og halda áfram frágangi
og byggingu þjónustuhúss við gamla olíumúlann. Þá er verið að hanna móttökuhús, og gönguleiðir fyrir farþega frá Sundabakka yfir að Byggðasafni og Sundahöfn, að Mávagarði til að tryggja öryggi þeirra og aðskilja þá eins og hægt er frá vinnusvæðum á hafnarsvæðinu.

Á Suðureyri er áætlað að stækka höfnina og bæta við einni flotbryggju til að auka viðlegurými. Kostnaður er 62 m.kr. og fást 37,5 frá ríkissjóði. Hlutur hafnasjóðs verður 24,5 m.kr.

Á Þingeyri er áætlað að kaupa stál til að endurbyggja hafskipabryggjuna árið 2025. Kostnaður er 150 m.kr. og þar af greiðir ríkið 112,5 m.kr. Hlutur hafnasjóðs verður því 37,5 m.kr.

Hlutur hafnasjóðs í framkvæmdunum öllum verður 520 m.kr.

Barnabætur verða frá og með næsta ári einnig fyrirframgreiddar á fæðingarári barns í samræmi við nýja reglugerð fjármála- og efnahagsráðherra sem tekur gildi 1. janúar 2025.

Í núverandi barnabótakerfi tekur greiðsla barnabóta mið af fjölda barna í lok síðastliðins árs og hafa foreldrar janúarbarna því þurft að bíða í þrettán mánuði eftir fyrstu greiðslu barnabóta í febrúar ári síðar. Nú mun þessi biðtími verða að hámarki fjórir mánuðir.

Barnabætur eru greiddar út fjórum sinnum á ári í núverandi kerfi. Fyrstu tvær greiðslur ársins eru fyrirframgreiðslur í febrúar og maí og nema þær helmingi áætlaðra barnabóta ársins. Þær eru dregnar frá útreiknuðum barnabótum ákvörðuðum við álagningu miðað við tekjur á skattframtali og er eftirstöðvunum skipt í tvær greiðslur í júní og október.

Fyrirframgreiðsla barnabóta á fæðingarári barns tekur mið af 50% af hámarksfjárhæð barnabóta fyrir hjón og sambúðarfólk og reiknast sem hlutfall af fjárhæð barnabóta sem gilda við álagningu á fæðingarárinu. Fyrirframgreiðsla á fæðingarári barns greiðist eftir atvikum og að hámarki með þremur jöfnum greiðslum á tekjuárinu. Fyrsta fyrirframgreiðsla barnabóta er greidd mánuði eftir lok hvers ársfjórðungs.

Með þessu fyrirkomulagi verður fyrirframgreiðslu á fæðingarári barns, ásamt þeim tveimur fyrirframgreiðslum sem þegar eru ákvarðaðar á álagningarári, dreift í 3-5 skipti allt eftir því hvenær barnið fæðist, og kemur fyrirframgreiðsla á fæðingarári barns til frádráttar fyrirframgreiðslum barnabóta næsta árs, þ.e. febrúar- og maígreiðslunum sem nema 50% af áætluðum barnabótum ársins.

Á dögunum áttu forystumenn Íþrótta- og Ólympíusamband Íslands (ÍSÍ) fund með nýkjörnum forseta Íslands og verndara ÍSÍ, Höllu Tómasdóttur, en það voru þeir Lárus L. Blöndal, forseti ÍSÍ, og Andri Stefansson, framkvæmdastjóri ÍSÍ, sem heimsóttu Höllu á skrifstofu forseta Íslands á Sóleyjargötu. 

Forseti Íslands hefur frá lýðveldisstofnun verið verndari ÍSÍ og í gegnum tíðina hefur embættið komið að starfi ÍSÍ með fjölbreyttum hætti.

Á fundinum var rætt um ýmsa þætti sem snúa að íþróttastarfi á Íslandi bæði í fortíð, nútíð og framtíð, samvinnu embættisins við ÍSÍ og árangur Íslendinga á alþjóðavettvangi.
Forseti Íslands og eiginmaður hennar eru mjög áhugasöm um íþróttir og heilbrigt líferni og margt í áherslum forseta fellur vel með því starfi sem íþróttahreyfingin sinnir á Íslandi.

Ísafjarðarbær veitir akstursstyrki vegna íþrótta- og tómstundastarfs barna árið 2024.

Styrkirnir eru til handa foreldrum barna og unglinga á grunnskólaaldri sem eiga lögheimili í Dýrafirði, Súgandafirði og Önundarfirði og taka þátt í skipulögðu íþrótta- og tómstundastarfi í Ísafjarðarbæ. Aðeins er veittur einn styrkur á hvert heimili á ári, óháð fjölda barna.

Ekki er greiddur út styrkur til barna og unglinga sem eiga lögheimili í Skutulsfirði þar sem frístundarúta milli Skutulsfjarðar og Bolungarvíkur þjónar þeim.

Sótt er um styrkinn á vefsíðu Ísafjarðarbæjar og er umsóknarfrestur til 16. desember.

Kjötframleiðsla í október 2024 var samtals 6.334 tonn, 2% minni en í október 2023. Svínakjötsframleiðslan var 3% minni en í október í fyrra. Hins vegar var alifuglaframleiðslan 14% meiri og nautakjötsframleiðslan 9% meiri. Þetta kemur fram í tölum sem Hagstofan hefur birt.

Sauðfjárslátrun lauk í október, heildarframleiðsla yfir sláturtíðina reyndist 5% minni en 2023 eða 7.964 tonn, bæði vegna færri skrokka og minni fallþunga.

Kindakjötsframleiðslan hefur aðeins einu sinni verið minni sl. 40 ár eða árið 1997 en þar munar aðeins 61 tonni.

Fiskvinnslan Íslandssaga hf á Suðureyri fagnar á föstudaginn , þann 6. desember, 25 ára afmæli.

Í tilefni af því verður opið hús hjá fyrirtækinu og eru allir boðnir velkomnir að koma og skoða starfsemina. Boðið verður uppá lagköku og snúða sem að Kvenfélagið Ársól færir félaginu á þessum tímamótum.

Opna húsið verður á milli 11-15 föstudaginn 6 desember nk.

Gestir verða leystit út með sýnishorni af framleiðslunni.

Miklar breytingar eru fram undan hjá fyrirtækinu og verður hægt að sjá og fræðast um það á þessum hátíðisdegi segir í tilkynningu frá Íslandssögu.