Tvær þyrlur Landhelgisgæslunnar, áhöfnin á TF-SIF eftirlitsflugvél Landhelgisgæslunnar, sjóbjörgunarsveitir á Vestfjörðum og áhöfnin á varðskipinu Þór voru kallaðar út laust fyrir klukkan 12 í kjölfar þess að skipstjóri farþegaskips hafði samband við stjórnstöð Landhelgisgæslunnar á uppkallsrásinni VHF 16 og tilkynnti að báturinn hefði tekið niðri í Ísafjarðardjúpi, út af Ögri.
47 eru um borð í bátnum en engar tilkynningar hafa borist um slys á fólki né verið tilkynnt um að leki hafi komið að honum. Sjólag á vettvangi er með besta móti en mikil þoka.
Vegna fjölda farþega um borð í skipinu var hópslysaáætlun virkjuð og óskað eftir því að samhæfingarstöð almannavarna yrði mönnuð.
Í tilkyningu frá Landhelgisgæslunni segir að á þessari stundu sé unnið að skipulagi þess að koma farþegum frá borði áður en reynt verður að koma skipinu á flot.
Uppfært kl 12:58. Lögreglan á Vestfjörðum upplýsir að enginn sé í hættu og hefur þjónustubátur frá fiskeldisfyrirtækinu Háafelli, sem var skammt frá, auk björgunarbátanna Kobba Láka frá Bolungarvík, Gísla Jóns frá Ísafirði og Svans frá Súðavík farið á vettvang og hefur farþegabáturinn verið tekinn í tog.
