Jarðgangaáætlun: blendin viðbrögð í Ísafjarðarbæ

Arna Lára jónsdóttir, bæjarstjóri segir að bæjarstjórn Ísafjarðarbæjar hafi ekki rætt nýja jarðgangaáætlunina en muni skila inn umsögn í samráðsgátt stjórnvalda. „Það vekur upp spurningar hvaða forsendur liggja að baki forgangsröðun í jarðgangaáætluninni. Það mun reyna á vel þjálfað langlundargeð Vestfirðinga ef þessi áform ganga eftir.“ Arn Lára segir það góðar fréttir að fá Breiðadalslegginn inn í áætlunina því það sé tímaspursmál hvenær slys verði í einbreiðum göngum „með fyrirsjáanlegri mikilli umferð þungaflutninga sem sækja í Ísafjarðarhöfn til að koma afurðum í útflutning ásamt öllum farþegaflutningum sem koma úr skemmtiferðaskipum. Einbreið göng bera ekki þessa umferð og það verður að grípa til aðgerða áður en alvarleg slys verða.“

Arn Lára Jónsdóttir.

Jóhann Birkir Helgason, oddviti D lista sjálfstæðismanna segir að listinn hafi ekki rætt sín í milli jarðgangaáætlunina eftir að hún kom fram, en það séu vonbrigði fyrir svæðið í heild að um 10 ár séu í næstu göng, en þó ánægjulegt að það séu áform um 5 jarðgöng á Vestfjörðum.

Jóhann Birkir Helgason.

DEILA