Kæru íbúar Ísafjarðarbæjar.
„Tíminn líður hratt á gervihnattaöld“, eins og segir í dægurlagatextanum og það má með sanni segja að tími minn hér fyrir vestan hafi liðið hratt.
Ég er afskaplega þakklátur fyrir þann tíma sem ég hef átt hér í Ísafjarðarbæ en ég kom til starfa þann 1. mars 2020 og hef ég því sinnt starfi bæjarstjóra í liðlega tvö ár. Á þessu tímabili hef ég kynnst ótal mörgu frábæru fólki í gegnum starf mitt og hef fundið vel fyrir þeim krafti sem býr í fólkinu á svæðinu og þeim einlæga ásetningi að láta gott af sér leiða fyrir samfélagið sitt. Margt hefur áunnist og margt spennandi er framundan í Ísafjarðarbæ.
Ég vil þakka fráfarandi bæjarstjórn fyrir samstarfið um leið og ég óska nýjum meirihluta til hamingju með sigur í kosningunum. Nýjum bæjarstjóra óska ég velfarnaðar í sínum störfum.
Ég vil að lokum þakka samstarfsfólki mínu fyrir góð kynni og gott samstarf en það kom vel í ljós í heimsfaraldrinum hversu öflugu fólki bærinn hefur á að skipa sem leysti fumlaust úr hverri þraut.
Áfram Ísafjarðarbær!
Kveðja,
Birgir Gunnarsson
