Hörður frá Ísafirði hefur tryggt sér sæti í úrvalsdeildinni á næsta keppnistímabili.
Hörður sigraði Þór frá Akureyri í lokaumferð 1. deildar karla í handknattleik á Ísafirði í kvöld.
Með sigrinum tryggði liðið sér sigur í 1. deildinni og sæti í úrvalsdeildinni í fyrsta sinn í sögu félagsins.
Leiknum lauk með 25:19-sigri Harðar en Rolands Lebedevs átti stórleik í marki Harðar og varði 16 skot.
Harðarmenn voru sterkari aðilinn strax frá fyrstu mínútu enda mikið í húfi fyrir þá en staðan í hálfleik var 14:9 Herði í vil.
Óli Björn Vilhjálmsson var markahæstur í liði Harðar með 6 mörk og Suguru Hikawa skoraði 5 mörk.