Stefnt er að því að breyting á aðalskipulagi Ísafjarðarbæjar, sem heimilar landfyllingu við Fjarðarstræti, svokallaðan Norðurbakka, verði afgreidd í bæjarstjórn í júní.
Þetta kemur fram í svörum bæjarstjóra við fyrirspurnum Örnu Láru Jónsdóttur, bæjarfulltrúa, sem spurðist fyrir um tímalínu verksins.
Gert er ráð fyrir að skipulagið verði auglýst í júlí og aðalskipulagstillagan endanlega afgreidd í ágúst. Dæling efnis í landfyllingu er talin geta hafist í apríl og standi yfir fram á haustið.
Fyrirhuguð landfylling norðan Skutulsfjarðareyrar (Eyrarinnar) mun skapa nýtt byggingarland sem er takmarkað í Skutulsfirði.
Í desember síðastliðinn kom fram að ágreiningur um þessa framkvæmd í bæjarstjórn. Bæjarfulltrúar Í listans vilja halda fjörunni í Fjarðarstræti og segja hana útivistarsvæði og aðdráttarafl fyrir bæjarbúa. Fjaran sé auk þess mikið nýtt af grunnskólabörnum. Í listinn bendir á að skynsamlegra sé að skoða landfyllingu við það sem kallast Torfnesrif. „Slík framkvæmd brýtur ölduna sem gengur í suðvestanáttum upp á Pollgötuna með tilheyrandi sjógangi. Hægt væri að sækja um styrk til hafnabótasjóðs og Vegagerðarinnar vegna þeirrar framkvæmdar. Mikill akkur er í því að gera Pollinn aðgengilegri“ segir í bókun bæjarfulltrúa listans.
