Fasteignagjöld viðmiðunarhúss í eldra hverfi á Ísafirði með því hæsta á landinu

Fasteignagjöld svonefnds viðmiðunarhúss eru með því hæsta á landinu á eyrinni í Skutulsfirði. Heildargjöldin eru 444 þúsund krónur og eru þau sjöttu hæstu á landinu. Hæst eru gjöldin á Seltjarnarnesi 489 þúsund krónur. Fasteignamat hússins með lóðamati er 87 milljónir króna sé það staðsett á Seltjarnarnesi en 36 m.kr. á Ísafirði.

Þetta kemur fram í skýrslu Þjóðskrár Íslands sem unnin var fyrir Byggðastofnun.

Fasteignagjöldin á Seltjarnarnesi eru því sem svarar 5.620 kr af hverri milljón kr fasteignarinnar en rúmlega tvöfalt hærri á Ísafirði eða 12.333 kr af hverri milljón kr.

Viðmiðunareignin er einbýlishús sem er 161,1 m² að grunnfleti og 476 m³ á 808 m² lóð. Fasteignagjöld eru reiknuð út af Byggðastofnun samkvæmt álagningarreglum ársins 2021 eins og þær eru í hverju sveitarfélagi, út frá fasteignamatinu sem Þjóðskrá reiknar og gildir frá 31. desember 2020.

Til fasteignagjalda teljast fasteignaskattur, lóðarleiga, fráveitugjald, vatnsgjald og sorpgjald. Mismunandi álagningarreglur eru í sveitarfélögunum og er fasteignaskattur t.d. frá 0,18% – 0,625% af fasteignamatinu. Á höfuðborgarsvæðinu er fasteignaskatturinn mældur í % mun lægri en t.d. á Vestfjörðum.

Hæst fasteignagjöld á Ísafirði

Hæst eru fasteignagjöldin á Vestfjörðum á eyrinni í Skutulsfirði 444 þúsund kr. en lægst á Flateyri, rétt innan við 200 þúsund kr.