Á Háskólahátíð fögnum við með þeim nemendum sem útskrifast úr meistaranámi hjá Háskólasetri sem og fjarnemum af Vestfjörðum. Háskólahátíð er þó ekki eingöngu fyrir útskriftarárgang, heldur líka fyrir alla fyrrverandi og núverandi nema, kennara, starfsfólk, stjórn og stofnaðila sem og aðra samstarfsaðila í gegnum tíðina.
Formleg útskrift er frá Háskólanum á Akureyri. Háskólasetrið efnir af þessu tilefni til háskólahátíðar á Hrafnseyri þann 17. júní 2021, eins og árlega. Háskólasetur Vestfjarða býður einnig velkomna alla vestfirska útskriftarnema til að samfagna á háskólahátíðinni á Hrafnseyri.
Þessi tilkynning er að sjálfsögðu send út með þeim fyrirvara að reglurnar muni leyfa samkomu eins og þessa. Eins og er mælir hins vegar ekkert á móti því að koma saman, fagna útskrift og eiga eftirminnilegan dag á Hrafnseyri.
Við eigum alltaf nokkrar húfur með áletruðum ártölum fyrri útskriftarára.Þess vegna er þeim sem geta ekki mætt með sínum útskriftarárgangi óhætt að koma á næsta ári, eða þess vegna á einhverjum næstu árum, og geta þá fengið afhenta áletraða húfu með réttu ártali .
Staðsetningin á Hrafnseyri gefur ríkan möguleika á að uppfylla sett skilyrði um bil milli manna. Athöfnin er úti undir berum himni meðan veður leyfir.
Von er á formlegu boðsbréfi þegar nákvæm dagskrá er tilbúin. Háskólahátíð er hluti af hátíðarhöldum á Hrafnseyri í tilefni 17. júni. Boðið verður upp á ókeypis sætaferðir frá Ísafirði á Hrafnseyri og til baka. Tillit verður tekið til flugs til/frá Ísafirði.
Af vefsíðu Háskólaseturs Vestfjarða
