Hér er samantekt af því helsta sem gerðist í viku 39 við vinnu Dýrafjarðarganga.
Byrjað var á lokastyrkingum í hægri vegg í göngunum. Bergboltum var komið fyrir á um 300 m kafla og sprautusteyptir voru 75 m áður en sementið kláraðist. Að auki var sprengt fyrir tengibrunnum við útskot B og H.
Í syðsta hluta vegarins í Arnarfirði var sett niður eitt ræsi og neðra burðarlag lagt á um 350 m kafla. Öðru ræsi var komið fyrir í tengiveginum að Mjólkárvirkjun. Í Dýrafirði var haldið áfram með fyllingavinnu í veg.
Syðri stöpull brúarinnar yfir Mjólká var steyptur á miðvikudeginum.
Byrjað var að taka niður steypustöðina og undirbúa fyrir flutning norður í Dýrafjörðinn. Í Dýrafirði var unnið við uppsetningu á verkstæðistjöldum, skrifstofum og vinnubúðum.
Á meðfylgjandi myndum má sjá þegar verið er að koma fyrir ræsi í tengiveginum að Mjólkárvirkjun, vegkaflann þar sem búið er að setja neðra burðarlag á veginn, myndir af vinnubúðunum í Dýrafirði og verkstæði og skrifstofur í Dýrafirði.
Baldvin Jónbjarnason, jarðeðlisfræðingur, Efla.
