Kjós í Leirufirði. Ljósm: © Mats Wibe Lund. |
bb.is | 17.03.2010 | 16:49„Ísfirðingar teknir í bólinu“
Páll Ásgeir Ásgeirsson, ísfirskur ferðamógull, blaðamaður og rithöfundur, segir að skilgreining stórs svæðis í Jökulfjörðum sem landbúnaðarsvæðis gæti orðið til þess binda endi á sextíu ára friðun Hornstrandafriðlandsins fyrir beit og ágangi. „Ísafjarðarbær sýndi afar slaka stjórnsýslu 2008 þegar látið var undir höfuð leggjast að svara fyrirspurnum ráðuneytis um afstöðu bæjarins til þessara breytinga þrátt fyrir ítrekaðar bréfaskriftir,“ segir í pistli Páls Ásgeirs á eyjan.is. „Ísafjarðarbær virtist því vakna við nokkuð vondan draum þegar ljóst varð í árslok 2008 að Leira og Kjós höfðu fengið stöðu lögbýlis án þess að bærinn fengi rönd við reist. Skipulagsvinna hélt þó áfram og í fyrstu tillögu að aðalskipulagi Ísafjarðarbæjar var ekki gert ráð fyrir landbúnaði í Jökulfjörðum. […] Í lokaútgáfu aðalskipulagsins sem nú bíður auglýsingar og afgreiðslu í Umhverfisráðuneyti er því stórt svæði í Jökulfjörðum skilgreint sem landbúnaðarsvæði.“Í pistlinum segir að það að skilgreina fyrrum eyðibýli sem lögbýli færir ekki eigandanum nein sérstök réttindi en þó er rétt að staldra við skýlausan rétt til þess að skrá greiðslumark á lögbýlið: „Í kjölfar þess að Leira og Kjós fengu þessa skilgreiningu án skýrrar andstöðu bæjarstjórnarinnar hefur skapast fordæmi fyrir aðra landeigendur á svæðinu. Því gæti lögbýlum á þessu svæði fjölgað og eigendur óátalið komið sér upp nokkrum kindum til að beita á skógarkerfil og skyldar plöntur sem margir telja til óþarfa.
Þannig hefur Ísafjarðarbær með sofandahætti og fúski í stjórnsýslu orðið til þess að opna hlið sem betur hefði verið lokað áfram. Þetta getur orðið til þess að binda endi á nærri sextíu ára friðun þessa svæðis fyrir beit og ágangi og breytt ásýnd þess varanlega. Þá gæti verið of seint fyrir bæjarstjórn Ísafjarðar að iðrast þess að hafa sofið þegar þeir áttu að vaka.“
Páll Ásgeir bendir á að griðlandið á Hornströndum er einstakt í sinni röð á Íslandi. „Alger friðun landsins fyrir beit búsmala síðustu 50-60 árin hefur gefið náttúrunni yfirbragð sem á engan sinn líka í byggð á Íslandi. Engir vegir, engar símalínur eða raflínur, engar girðingar, aðeins látlaus hús og rústir í grænum túnum. Allt leggst þetta á eitt við að gera griðlandið á Hornströndum og eyðibyggðirnar í Jökulfjörðum og Grunnavík að svæði sem á enga hliðstæðu á Íslandi.“
Pistillinn í heild
thelma@bb.is
Til baka - Prenta frétt - Senda frétt - Senda á Facebook
Kommentað um frétt (5 Komment )
Páll láttu okkur fyrir vestan í friði þú gast ekki búið hjá okkur, og landið sem þú ert að ráðskast með og Rúnar selur aðgang að, ásamt fleirum er að stórum hluta stolið.
Konráð G Eggertsson.
Í umræðuþræði pistilsins sem Halldór vísar í er líka eftirfarandi tilvitnun úr bréfi ráðuneytis landbúnaðarmála til bæjarstjóra frá 26. jan. 2009.
„…bréfið frá 28. apríl s.l. hafði ekki að geyma umsögn sveitarstjórnar eins og áskilið er í lagagreininni heldur einungis tilkynningu starfsmanns bæjarins um þessa takmörkuðu bókun umhverfisnefndar. ..
Í bréfi ráðuneytisins til Ísafjarðarbæjar dags. 13. maí s.l. var óskað eftir umsögn um stofnun lögbýla, athygli vakin á ákvæðum jarðalaga um lögbýli…
Ráðuneytinu barst ekki svar við bréfi þessu og varð því að ítreka beiðni um umsögn með bréfi dags. 5. júní s.l. Til samræmis við góða stjórnsýsluhætti var í bréfinu vakin athygli á skyldu stjórnvaldshafa til að taka ákvörðun þótt umsagnar lögboðins umsagnaraðila yrði ekki aflað. Við þessu bréfi barst ekki heldur svar.“
Ekki fæst betur skilið úr þessari tilvitnun en að umsögnin sem Ísafrjarðarbær veitti hafi ekki verið nógu formleg og því ekki tekin gild, þ.e. það nægir ekki að fá tilkynningu (ekki umsögn skv. ofangreindri tilvitnun) frá einum eða tveim starfsmönnum bæjarins.
Einnig vil ég benda á (en þetta er svoldið smámunasamt, en það er víst þannig að rétt skal ver rétt) að enginn annar en Halldór benti á þarna í svarhalanum að þetta væri rangt, sem er það fyrsta sem hann heldur fram í svari sínu hérna. Eða er ég að lesa athugasemdirnar eitthvað vitlaust?
Kv, Ólafur Jens Sigurðsson
Er það lýðræði að einn þáverandi ráðherra (sem svo skemmtilega vill til að er ættaður úr Bolungarvík) geti tekið þá afdrifaríku ákvörðun að breyta óbyggðu svæði til margra áratuga, í landbúnaðarsvæði? Láta svo hafa eftir sér í útvarpi að fólk ætti að taka því fagnandi ef fólk ætli að fara að stunda búskap á eyðijörðum. Þetta er ekki eins og hver önnur eyðijörð við þjóðveginn. Þarna kom flokksbróðir þinn aftan að þér Halldór, þrátt fyrir skýran vilja bæjaryfirvalda í málinu. Eins og landeigandinn og vegagerðarmaðurinn. Fuss og svei!
kv
Rúnar Karlsson
Páll Ásgeir ætti ekki að vera með svona hrokafullar yfirlýsingar sem hann hefur lítið með að gera og væri nær að leiðrétta rangfærslurnar í bókinni sem hann gaf úr um svæðið sem er með rangfærslum víða vegna þess að hann hafði ekki áhuga á að fá upplýsingar hjá heimamönnum sem er lýsandi dæmi um hanns vinnubrögð.
Eins og undirritaður og fleiri benda á í athugasemdum við pistilinn er það rangt að stjórnsýsla Ísafjarðarbæjar hafi brugðist.
Afstaða bæjarins, bókuð í umhverfisnefnd, lá fyrir og var send ráðuneytinu. Í bréfi ráðuneytisins til bæjarins kemur þessi afstaða fram. Hún var sú að bærinn lagðist gegn því að skilgreina þarna lögbýli. Það var samt gert.
Talandi um ákvörðun í aðalskipulagi þá mætti halda af lestri pistilsins að þarna væru engir landeigendur aðrir en hið opinbera. En svo er ekki. Allt þetta land, eða a.m.k. nánast allt þetta land er í eigu einkaaðila. Þeir tóku þátt í aðalskipulagsvinnu og höfðu skiljanlega mikil áhrif á niðurstöðuna. Þannig virkar samstarf og samráð í skipulagi.
Annars er merkilegt hvað marga dreymir um að allar ákvarðanir í skipulagsmálum og helst öllum málum séu teknar af öðrum en heimamönnum. Ótrúlega margir tala um að miðstýra skipulaginu og færa skipulagsvaldið til ríkisins. Það er meiri lýðræðisástin það.
Halldór Halldórsson
bæjarstjóri Ísafjarðarbæjar.
Til að geta kommentað um fréttir þarftu að innskrá þig í dálkinum vinstra megin, eða nýskrá þig ef þú ert ekki þegar skráður.