Fiskveisla á Suðureyri
Íslandssaga hf. og Klofningur ehf. buðu starfsfólki sínu og mökum til fiskveislu í félagsheimilinu á Suðureyri laugardaginn 30. apríl. Voru þar samankomnir um 160 veislugestir en þetta er í fjórða sinn sem veislan er haldin. „Fiskveislan heppnaðist að öllu leiti frábærlega vel. Það var allt frábært á matseðlinum en framreiddir voru 18 réttir þar sem kenndi ýmissa grasa“, segir Óðinn Gestsson, framkvæmdastjóri Íslandssögu. Matreiðslumeistarar SKG veitinga framreiddu kræsingar úr afurðum fyrirtækjanna og unnu rétti úr steinbít, ýsu, keilu, ufsa og þorski. Fjölbreytt skemmtidagskrá var einnig í boði og skemmti leikarinn Magnús Ólafsson gestum, en Magnús er vel þekktur sem Bjössi bolla. Þá var nýja sæluhelgarlagið „Sæluminningar“ kynnt og Pínulitli leikklúbburinn flutti atriði úr Dýrunum úr Hálsaskógi. Að borðhaldi loknu hélt slóvaski skífuþeytirinn DJ Slavo uppi fjörinu á diskóteki fram eftir nóttu. Páll Önundarson var í veislunni og tók þar meðfylgjandi myndir.