31.05.2008 – Um 300 manns sóttu árlega fiskveislu fyrirtækjanna Íslandssögu og Klofnings á Suðureyri sem fór fram í Þurrkverskambinum 31. maí. Veislan þótti heppnast ljómandi vel og sett var Íslandsmet í framreiðslu á murikka pönnum. „Við afgreiddum 250 skammta á einum og hálfum klukkutíma og 162 pylsur samhliða því. Við grilluðum fjórar tegundir af fiski og það var mjög góð stemmning“, segir Óðinn Gestsson, framkvæmdastjóri Íslandssögu. Fiskiveislan hefur verið haldin ár hvert frá því á aldamótum og ætíð góður rómur gerður að henni. Að lokinni veislu var haldið á bryggjuball þar sem Johnny King hélt uppi fjörinu. Páll Önundarson var viðstaddur og tók meðfylgjandi myndir.