Óhætt er að segja að mikil gleði hafi ríkt á Suðureyri laugardagskvöldið 22. maí þegar fyrirtækin Íslandssaga og Klofningur buðu starfsfólki sínu og mökum til sameiginlegrar fiskveislu. Um 160 manns mættu til veislunnar sem var haldin í félagsheimili staðarins en SKG-veitingar sáu um matargerð og var eingöngu fiskur í boði. Brugðið var út af vananum í þetta sinn og ekki matreiddur fiskur sem fyrirtækin framleiða eins og tíðkast hefur síðustu tvö ár. Skemmtiatriðin voru ekki af lakara taginu því Laddi og Jóhannes Kristjánsson, eftirherma, komu að sunnan til kitla hláturtaugar matargesta og tókst frábærlega til að sögn viðstaddra. Á dagskránni voru að auki heimatilbúin skemmtiatriði og hlutu þau ekki síðri undirtektir veislugesta. Að loknum skemmtiatriðum var stiginn dans fram á nótt. Páll Önundarsson lét sig að sjálfsögðu ekki vanta í veisluna og tók þar meðfylgjandi myndir.